ضيــــــــــــــــــــــــــاع الدرح5

ﺿﻴﺎﻉ ﺍﻟﺪﺭ ..
ﺍﻟﺤﻠﻘﺔ ﺍﻟﺨﺎﻣﺴﺔ.
ﺍﻟﺠﻴﻠﻲ ﻭﻗﺖ ﺳﻤﻊ ﺍﻟﻜﻼﻡ ﻣﻦ ﺍﻟﺰﻋﻴﻢ .. ﺳﻜﺖ ﻣﺴﺎﻓﺔ .. ﻭﺭﻓﻊ ﺭﺍﺳﻮ ﻭﻗﺎﻝ
ﻟﻴﻬﻮ .. ( ﺃﻧﺎﻣﻮﺍﻓﻖ ) .. ﺍﺑﻮﻫﻮ ﻃﻴﺮ ﻋﻴﻮﻧﻮ ﻭﻗﻌﺪ ﻳﻌﺎﻳﻦ ﻟﻴﻬﻮ .. ﻭﺧﺎﻟﻮ ﻗﺎﻝ
ﻟﻴﻬﻮ ﻣﻮﺍﻓﻖ؟ !! ﻣﻮﺍﻓﻖ ﻋﻠﻲ ﺷﻨﻮ ﻳﺎ ﺍﻟﺠﻴﻠﻲ ؟ .. ﻗﺎﻝ ﻟﻴﻬﻮ ﻣﻮﺍﻓﻖ ﻋﻠﻰ
ﺷﺮﻭﻁ ﺍﻟﺰﻋﻴﻢ ﺩﻱ ﻛﻠﻬﺎ .ﺧﺎﻟﻮ ﻗﺎﻝ ﻟﻴﻬﻮ ﻣﻦ ﻭﻳﻦ ﺑﺘﺠﻴﺐ ﺩﻩ ﻛﻠﻮ؟ ﻗﺎﻝ ﻟﻴﻬﻮ
ﻳﺎﺧﺎﻝ ( ﺍﺳﺘﻐﻔﺮ ﺍﻟﻠﻪ ) .. ﺍﻟﻠﻪ ﺃﺑﻮﺍﺑﻮ ﺑﺎﻟﺨﻴﺮ ﻭﺍﻟﺮﺯﻕ ﻣﺎﺟﻔﺖ ..
ﺍﻟﺰﻋﻴﻢ ﻗﺎﻝ ﻟﻴﻬﻮ .. ﻋﻠﻰ ﺍﻻﻗﻞ ﻳﺎ ﺍﻟﺠﻴﻠﻲ ﻳﺎﻭﻟﺪﻱ .. ﺍﺩﻱ ﺭﻭﺣﻚ ﻓﺮﺻﺔ
ﻭﻓﻜﺮ
ﻓﻲ ﻛﻼﻣﻲ ﻭﺭﺩ ﻟﻲ .. ﻗﺎﻝ ﻟﻴﻬﻮ ﻣﺎﺩﺍﻳﺮﺍ ﻟﻴﻬﺎ ﺗﻔﻜﻴﺮ ﻳﺎﻋﻢ .. ﺍﻧﺎ ﻣﻮﺍﻓﻖ ..
ﺍﻟﺰﻋﻴﻢ ﻗﺎﻝ ﻟﻴﻬﻮ ﺧﻼﺹ ﺍﺧﺪ ﺍﻟﻮﻗﺖ ﺍﻟﺒﺮﻳﺤﻚ ﻭﺗﻌﺎﻝ ﻟﻲ . ﺍﻟﺒﺖ ﻗﺪﺍﻣﻬﺎ
ﻗﺮﺍﻳﺔ .. ﻗﺎﻝ ﻟﻴﻬﻮ ﺍﻧﺎ ﻳﺎﻋﻢ ﺍﺣﻤﺪ ..
ﺯﺍﺗﻲ ﻣﺎﻣﺴﺘﻌﺠﻞ .. ﺳﻨﺔ .. ﺳﻨﺘﻴﻦ ﺗﻜﻔﻴﻜﻢ ؟ ﻗﺎﻝ ﻟﻴﻬﻮ ﺧﻴﺮ ﺗﻜﻮﻥ
ﺍﺗﻌﻠﻤﺖ ﺍﻟﺒﻜﻔﻴﻬﺎ ﻭﻟﻮ ﻏﻴﺮﺗﺎ ﺭﺍﻳﻚ ﻓﻲ ﺍﻱ ﻟﺤﻈﻪ ﻛﻠﻤﻨﻲ ..ﻗﺎﻟﻴﻬﻮ ﻣﺎﺑﻐﻴﺮ ﺭﺍﻱ
ﺍﻧﺎ ﺧﻼﺹ ﻗﺮﺭﺕ .. ﻭﻣﺸﻮ ﻋﻠﻰ ﻛﺪﻱ.
ﻟﻤﻦ ﻃﻠﻌﻮ ﺍﻻﺑﻮ ﻣﺤﺘﺎﺭ ﻓﻲ ﻛﻼﻡ ﺍﻟﺰﻋﻴﻢ .. ﻭﻣﺴﺘﻐﺮﺏ ﻓﻲ ﻛﻼﻡ ﻭﻟﺪﻭ
ﺍﻛﺘﺮ .. ﻭﻗﺎﻝ ﻟﻴﻬﻮ ﻳﺎﻭﻟﺪﻱ ﺍﻧﺖ ﻣﺘﺄﻛﺪ ﻣﻦ ﻗﺮﺍﺭﻙ ﺩﻩ؟ .. ﻗﺎﻝ ﻟﻴﻬﻮ ﺗﻤﺎﻡ
ﺍﻟﺘﺎﻛﻴﺪ ﻳﺎﺑﺎ ..
ﺍﻟﺤﺼﻞ ﺍﻧﻮ ﺑﺎﻛﺮ ﻣﻦ ﺍﻟﺼﺒﺎﺡ ﺍﻟﺠﻴﻠﻲ ﻋﻨﺪﻭ ﺍﺭﺑﻌﺔ ﻣﻌﺰﺍﻳﺎﺕ ﻭﺩﺍﻫﻦ ﺍﻟﺴﻮﻕ
ﻭﺑﺎﻋﻦ ﺍﻻﺭﺑﻌﺔ .
ﻭﺷﺎﻝ ﺍﻟﻘﺮﻳﺸﺎﺕ .. ﻭﺍﺧﺪ ﺍﻟﻌﻔﻮ ﻣﻦ ﺍﻣﻪ ﻭﺍﺑﻮﻫﻮ ﻭﺳﺎﻓﺮ ﺍﻟﺨﺮﻃﻮﻡ ﻋﻨﺪﻩ
ﺍﺻﺤﺎﺏ ﻫﻨﺎﻙ .. ﺍﺻﺤﺎﺏ ﺑﺸﺪﻭ ﺍﻟﺤﻴﻞ .. ﻗﺎﻟﻬﻢ ﺍﻧﺎ ﻋﻨﺪﻱ ﻧﻴﺔ ﺍﻏﺘﺮﺍﺏ ..
ﻭﻗﻔﻮﺍ ﻣﻌﺎﻫﻮ ﻭﻗﻔﺔ ﺭﺟﺎﻝ .. ﻃﻠﻊ ﺍﻭﺭﺍﻗﻮ .. ﺟﻮﺍﺯﻩ ﻭﺣﺎﺟﺎﺗﻪ .. ﻭﺑﻲ ﺍﺧﺘﺼﺎﺭ
ﺭﺑﻨﺎ ﻭﻓﻘﻮ ﺑﻲ ﻋﻘﺪ ﻋﻤﻞ . ﺑﻮﺍﺳﻄﺔ ﺍﺧﻮ ﺻﺎﺣﺒﻮ ﻓﻲ ﺟﺪﺓ .. ﻭﺑﻌﺪ ﺍﺳﺒﻮﻉ
ﻓﻘﻂ .. ﺭﺳﻞ ﺟﻮﺍﺏ ﻟﻲ ﻧﺎﺱ ﺍﻟﺒﻴﺖ ..ﻭﻗﺎﻝ ﻟﻬﻢ ﺍﻧﺎ ﻣﺴﺎﻓﺮ ﺍﻟﺴﻌﻮﺩﻳﺔ ..
ﻭﻟﻮ ﻣﺎ ﻭﻓﻴﺖ ﺑﺸﺮﻭﻁ ﺍﻟﺰﻋﻴﻢ ﻣﺎﺑﺮﺟﻊ .. ﻭﻓﻌﻼ "ﺳﺎﻓﺮ ..
ﺳﺎﻓﺮ ﺍﻟﺠﻴﻠﻲ .. ﻣﻦ ﺩﻭﻥ ﻳﻮﺩﻉ ﺍﻣﻪ ﻭﺍﺑﻮﻫﻮ ..
ﻭﻣﻦ ﺩﻭﻥ ﻳﻮﺩﻉ ﺭﻭﺣﻮ ﺑﺪﺭﻳﻪ ..
ﺑﺪﻭﺭ ﺍﻟﺘﻢ ﺗﻤﺎﻣﺔ ﺍﻟﺨﻴﺮ ..
ﻫﺠﺎ ﺑﻲ ﺳﺒﺐ ﺍﻟﻘﺮﻭﺵ ..
ﻫﺠﺎ ﻓﻮﻕ ﺩﺭﺏ ﺍﻟﻌﺰﺍﺑﺎﺕ ﻭﺍﻟﻀﻨﻰ ..
ﻫﺠﺎ ﻣﻦ ﺍﺟﻞ ﺍﻟﻄﻤﻊ ..
ﻓﻲ ﺷﺎﻥ ﻣﺒﺎﻫﺎﺕ ﺍﻟﺰﻋﻴﻢ ..
ﻫﺠﺎ ﺷﺎﻥ ﻳﻘﺪﺭ ﻳﻄﻮﻝ ﺳﺖ ﺍﻟﺒﻨﺎﺕ ..
ﻭﺳﺎﻓﺮ ..
ﻭﺍﻟﺘﻄﻮﺭﺍﺕ ﺩﻱ ﻛﻠﻬﺎ ﺍﻟﺰﻋﻴﻢ ﻣﻮﻋﺎﺭﻓﻬﺎ .. ﻟﻜﻦ ﺑﺪﺭﻳﺔ ﻋﻨﺪﻫﺎ ﻛﻞ ﺍﻟﺘﻔﺎﺻﻴﻞ ﻣﻦ
ﺻﻔﻴﺔ .. ﻭﻣﻨﺘﻈﺮﺍﻫﻮ ﻋﻠﻰ ﺍﺣﺮ ﻣﻦ ﺍﻟﺠﻤﺮ .. ﻭﺣﺒﻬﺎ ﻛﻞ ﻳﻮﻡ ﺑﺰﻳﺪ .. ﺑﻌﺪ
ﻓﺘﺮﺓ ﻣﻦ ﺍﻟﺰﻣﻦ .. ﺍﻟﺰﻋﻴﻢ ﺳﻤﻊ ﺍﻧﻮ ﺍﻟﺠﻴﻠﻲ ﺳﺎﻓﺮ ﺍﻟﺴﻌﻮﺩﻳﺔ .
ﻭﻗﺎﻝ ﻟﻲ ﺍﻟﺠﻤﺎﻋﺔ .. ﻫﺴﻊ ﺍﻟﺴﻨﺘﻴﻦ ﺑﺘﻨﺘﻬﻲ.. ﻭﺍﻧﺎ ﻋﻠﻰ ﻭﻋﺪﻱ .. ﺍﻟﺰﻭﻝ ﺩﻩ
ﻛﺎﻥ ﻗﺪﺭ ﻳﻮﻓﻲ ﻋﻠﻰ ﺍﻟﻄﻼﻕ ﺍﻧﺎ ﻣﺎﺑﻨﻂ ﻣﻦ ﻛﻠﻤﺘﻲ ..
ﺑﻌﺪ ﻣﺎ ﺍﻟﺠﻴﻠﻲ ﺳﺎﻓﺮ .. ﺍﻟﺤﻠﺔ ﺑﻘﺖ ﻣﺴﻴﺨﺔ .. ﻭﺍﻟﺒﻴﺖ ﺑﻘﻰ ﺷﻜﻠﻮ ﻛﺌﻴﺐ ..
ﻭﻧﺎﺱ ﺍﻟﻘﻮﺯ ﺍﻟﺘﻘﻮﻝ ﻣﻴﺖ ﻟﻬﻢ ﺯﻭﻝ ..
ﻭﻧﺴﺘﻬﻢ ﻣﺴﺨﺖ ﻭﺷﻠﺘﻬﻢ ﺍﻧﺸﻠﺖ .. ﻭﺍﻟﻀﺤﻜﺎﺕ ﻭﺍﻟﻔﺮﺣﺔ ﺯﺍﻟﺖ .. ﺍﻟﺠﻴﻠﻲ
ﻛﺎﻥ ﺭﻭﺡ ﺍﻟﺤﻠﺔ .. ﺍﻟﺠﻴﻠﻲ ﻛﺎﻥ ﺑﺨﺪﻡ ﺍﻟﻨﺎﺱ .. ﻭﻳﺴﺎﻋﺪ .. ﻟﻮﻛﺎﻥ ﻓﻲ ﻋﺮﺱ
ﻓﻲ ﺍﻟﺤﻠﺔ .. ﺍﻟﺠﻴﻠﻲ ﺑﻜﻮﻥ ﺍﻭﻝ ﺯﻭﻝ ﻳﺠﻲ ﻳﺸﺘﻐﻞ ﻭﻳﺨﺪﻡ ﺍﻟﻀﻴﻮﻑ .. ﻭﻛﺎﻥ
ﻓﻲ ﺑﻜﺎ ﺑﻜﻮﻥ ﻣﺘﻮﺍﺟﺪ ﺍﻛﺘﺮ ﻣﻦ ﺍﻫﻞ ﺍﻟﻤﻴﺖ .. ﺍﻟﺰﻭﻝ ﺯﻭﻝ ﻭﺍﺟﺒﺎﺕ .. ﻭﺍﻟﻨﺎﺱ
ﻛﻠﻬﺎ ﺑﺘﺤﺒﻮ ..
ﺍﻟﻨﺎﺱ ﻛﻠﻬﺎ ﻓﻘﺪﺕ ﺍﻟﺠﻴﻠﻲ .. ﺍﻟﻤﺮﺍﺓ ﻭﺍﻟﺮﺍﺟﻞ ﻭﺍﻟﻜﺒﻴﺮ ﻭﺍﻟﺼﻐﻴﺮ .. ﻭﺍﻟﻄﻔﻞ
ﻭﺍﻟﻌﺠﻮﺯ .. ﻣﻦ ﺍﻟﻠﻪ ﺧﻠﻘﻮ ﻣﺎﺟﺎﺏ ﻣﺸﻜﻠﺔ ﻟﺰﻭﻝ ..
ﺍﻟﺰﻋﻴﻢ ﺍﻟﻠﻪ ﻳﺴﺎﻣﺤﻮ ﺍﺗﺴﻠﻂ ﻋﻠﻴﻬﻮ ﻃﻔﺸﻮ ﻣﻦ ﺍﻟﺒﻠﺪ ..
ﻣﺮﺕ ﺍﻻﻳﺎﻡ ﻭ ﻭﺍﻟﺨﺒﺮ ﻣﻘﻄﻮﻉ ﻣﻦ ﺍﻟﺠﻴﻠﻲ ﻭﻣﻮﻣﻌﺮﻭﻑ ﺍﻟﺤﺎﺻﻞ ﻋﻠﻴﻬﻮ
ﺷﻨﻮ .. ﻭﻣﺮﺭﺭﺭﺭﺭﺭﺭﺕ ﺍﻻﻳﺎﻡ ..
ﻓﻲ ﻳﻮﻡ ﻣﻦ ﺫﺍﺕ ﺍﻻﻳﺎﻡ ﻛﺎﻥ ﻓﻲ ﻋﺮﺱ ﻓﻲ ﺍﻟﺤﻠﺔ .. ﻭﺍﻟﻨﺎﺱ ﺟﻮ ﻣﻦ
ﺍﻟﺨﺮﻃﻮﻡ ﻭﻓﻲ ﻧﺎﺱ ﺍﻏﺮﺍﺏ ﺟﻮ .. ﻓﻲ ﻭﺍﺣﺪ ﻣﻦ ﺍﻭﻻﺩ ﺍﻟﻤﺪﻳﻨﺔ .. ﺷﺎﻑ
ﺑﺪﺭﻳﺔ ﻓﻲ ﺍﻟﻤﻨﺎﺳﺒﺔ .. ﺍﺳﻤﻮ (ﻣﻨﺘﺼﺮ ) .. ﻭﺳﺄﻝ ﻣﻨﻬﺎ .. ﻗﺎﻟﻮ ﻟﻴﻬﻮ ﻓﻲ
ﻭﺍﺣﺪ ﺍﺗﻜﻠﻢ ﻓﻴﻬﺎ ..ﻭﺍﺑﻮﻫﺎ ﺧﺘﻪ ﻟﻴﻬﻮ ﺷﺮﻭﻁ .. ﻣﺪﺗﻬﺎ ﺳﻨﺘﻴﻦ .. ﻗﺎﻝ ﻟﻴﻬﻢ
ﺍﻟﺸﺮﻭﻁ ﺷﻨﻮ؟ ﻭﺭﻭﻫﻮ .. ﻗﺎﻝ ﻟﻴﻬﻢ ﺍﻧﺎ ﺑﻮﻓﻲ ﺍﻟﺸﺮﻭﻁ ﺩﻱ ﻓﻲ ﺍﺳﺒﻮﻉ ..
ﻗﺎﻝ ﻛﺪﺍ .. ﻻﻧﻮ ﻏﻨﻲ .. ﻭﺍﺑﻮﻫﻮ ﺭﺟﻞ ﺍﻋﻤﺎﻝ ﻭﻋﻨﺪﻭ ﺍﻣﻼﻙ ﻓﻲ ﺍﻟﻌﺎﺻﻤﺔ ..
ﻭﻗﺎﻟﻮ ﻛﺎﻥ ﻭﺯﻳﺮ ﺳﺎﺑﻖ .. ﻭﺯﻭﻝ ﻣﻌﺮﻭﻑ ﻭﺍﻟﺰﻋﻴﻢ ﺑﻌﺮﻓﻪ .. ﺃﻫﺎ ﻣﻌﺘﺼﻢ ﻭﺩ
ﺍﻟﻤﺼﺎﺭﻳﻦ ﺍﻟﺒﻴﺾ . ﻋﻤﻞ ﻓﻴﻬﺎ ﻣﺎﻋﺎﺭﻑ ﺍﻟﻤﻌﻠﻮﻣﺔ ﺑﺘﺎﻋﺔ ﺍﻟﺒﺖ ﻣﺘﻜﻠﻤﻴﻦ ﻓﻴﻬﺎ ..
ﺑﻌﺪ ﻛﻢ ﻳﻮﻡ ﻣﻌﺘﺼﻢ ﻛﻠﻢ ﺍﻫﻠﻪ .. ﻭﻗﺎﻝ ﻟﻴﻬﻢ ﺍﻧﺎ ﻋﺎﻳﺰ ﺑﺖ ﺍﻟﺰﻋﻴﻢ ﺣﺎﺝ ﺍﺣﻤﺪ
ﺷﻔﺘﻬﺎ ﻓﻲ ﺍﻟﻌﺮﺱ ..
ﻧﻤﺸﻮ ﺗﺨﻄﺒﻮﻫﺎ ﻟﻲ .. ﻭﺍﻫﻠﻮ ﻓﺮﺣﻮ ﺟﺪﺍ .. ﻻﻧﻮ ﺍﻟﺰﻋﻴﻢ ﺭﺍﺟﻞ
ﻣﻌﺮﻭﻑ ..ﻭﺍﻳﺪﻭ ﻭﺍﺻﻠﻪ ﻓﻲ ﺍﻟﺒﻠﺪ ﻛﻠﻬﺎ ..
ﺻﺎﺣﺐ ﻧﻔﻮﺫ .. ﻭﻫﻢ ﺣﻴﺴﺘﻔﻴﺪﻭﺍ ﻣﻨﻪ ﺍﺟﺘﻤﺎﻋﻴﺎ ﻭﺍﻗﺘﺼﺎﺩﻳﺎ " .. ﻭﻛﻠﻬﺎ ﻛﻢ ﻳﻮﻡ
ﻗﺮﺭﻭﺍ ﻳﺴﺎﻓﺮ ﻟﻠﺰﻋﻴﻢ ﻓﻲ ﺍﻟﺒﻠﺪ ﻭﻳﺨﻄﺒﻮ ﺑﺘﻮ ..
ﻭﻳﻮﻡ ﻓﻲ ﺍﻟﻀﻬﺮﻳﺔ ﻛﺪﺍ .. ﻓﻲ ﺗﻼﺗﺔ ﻋﺮﺑﺎﺕ ﺟﺪﻳﺪﺓ ﻣﻘﻔﻠﺔ ﻭﻣﻈﻠﻠﻪ .. ﺩﺧﻠﺖ
ﺍﻟﺤﻠﺔ .. ﻭﻭﻗﻔﺖ ﻗﺪﺍﻡ ﺑﻴﺖ ﺍﻟﺰﻋﻴﻢ .. ﻓﻲ ﻣﺸﻬﺪ ﻣﻬﻴﺐ ..
ﻭﻧﺰﻟﻮ ﻣﻨﻬﺎ ﻧﺎﺱ ﻧﻀﺎﺍﺍﺍﺍﻑ ﻭﻻﺑﺴﻴﻦ ﺟﻼﻟﻴﺐ ﻣﻜﻮﻳﺔ ﻭﺗﻠﻤﻊ ﻭﺷﺎﻻﺕ ﻭﺍﺣﺪﻳﻦ
ﻻﺑﺴﻴﻦ ﺑﺪﻝ ﺑﺎﻟﻜﺮﻓﺘﺎﺕ .. ﻧﺎﺱ ﺳﻤﺤﻴﻦ ﺳﻤﺤﻴﻦ ﻛﺪﺍ ﻳﻠﻤﻌﻮ .. ﻭﺩﺧﻠﻮ ﻋﻠﻰ
ﺣﺎﺝ ﺍﺣﻤﺪ .. ﻭﻣﻦ ﻭﻗﺘﻮ ﺣﺎﺝ ﺍﺣﻤﺪ ﺣﺲ ﺍﻧﻮ ﺍﻟﻨﺎﺱ ﺩﻳﻞ ﻧﺎﺱ ﺧﻄﻮﺑﻪ ﻭﻧﺎﺱ
ﻋﺮﺱ ..
ﺍﻟﻤﻬﻢ ﺍﻟﻀﺒﺎﻳﺢ ﺭﻗﺪﺕ ﻫﺒﻄﺮﺵ ﻭﻓﻲ ﻟﺤﻈﺎﺕ ﺍﻟﻐﺪﺍ ﺟﻬﺰ ﻟﻠﻀﻴﻮﻑ .. ﻭﺍﻟﺪﻳﻮﺍﻥ
ﺍﺗﻤﻼ ﻣﻦ ﻧﺎﺱ ﺍﻟﺤﻠﺔ ..
ﻭﻓﻲ ﻭﺍﺣﺪ ﻣﻦ ﺍﻟﻀﻴﻮﻑ ﻧﺎﺩﻯ ﺍﻟﺰﻋﻴﻢ ﻋﻠﻰ ﺟﻨﺐ .. ﻭﻗﺎﻝ ﻟﻴﻬﻮ .. ﺍﻟﻨﺎﺱ
ﺩﻳﻞ
ﺟﺎﻳﻴﻦ ﻳﻄﻠﺒﻮ ﺑﺘﻚ .. ﺍﻟﺰﻋﻴﻢ ﻃﺒﻌﺎ ﺑﻘﻰ ﻓﻲ ﻣﻮﻗﻒ ﻣﺤﺮﺝ .. ﻟﻮ ﺍﻟﻨﺎﺱ ﺩﻳﻞ
ﻃﻠﺒﻮ ﺍﻟﺒﺖ ﻭﺃﺣﺮﺟﻬﻢ ﻭﻗﺎﻝ ﻟﻬﻢ ﺍﻟﺒﺖ ﻣﺘﻜﻠﻤﻴﻦ ﻓﻴﻬﺎ .. ﺑﻜﻮﻥ ﻓﻘﺪ ﺷﺮﻳﺤﺔ
ﻛﺎﻣﻠﺔ ﻣﻦ ﺍﻟﻮﺍﺟﻬﺔ ﺍﻻﻗﺘﺼﺎﺩﻳﺔ ﻭﺍﻻﺟﺘﻤﺎﻋﻴﺔ .. ﻭﻛﺴﺮ ﺧﺎﻃﺮ ﻧﺎﺱ ﻟﻴﻬﻢ
ﻭﺯﻥ .. ﻭﻋﺸﺎﻥ ﻣﻨﻮ؟ ﻋﺸﺎﻥ ﺍﻟﺠﻴﻠﻲ ﺍﻟﻤﻘﻄﻊ ﺍﻟﻔﻘﺮﺍﻥ ..
ﻭﻛﺎﻥ ﻭﺍﻓﻖ ﻋﻠﻴﻬﻢ ﺑﻔﻘﺪ ﻫﻴﺒﺘﻮ ﻭﻣﺼﺪﺍﻗﻴﺘﻮ ﻓﻲ ﺍﻟﺤﻠﺔ .. ﻻﻧﻮ ﻧﺎﺱ ﺍﻟﺤﻠﺔ
ﻛﻠﻬﻢ ﻋﺎﺭﻓﻴﻦ ﺍﻧﻮ ﺍﺩﻯ ﺍﻟﺠﻴﻠﻲ ﻛﻠﻤﺔ ﻭﺍﻟﺠﻴﻠﻲ ﺭﺍﺑﻄﻮ ﻣﻦ ﻟﺴﺎﻧﻪ .. ﻛﺪﻱ ﺑﻌﺪ
ﺍﻟﻐﺪﺍ ﻧﺸﻮﻑ ﺍﻟﺒﺤﺼﻞ ..
ﺍﻟﻰ ﺍﻟﻠﻘﺎﺀ