ضيــــــــــــــــــــــــــاع الدرح2

ﺿﻴﺎﻉ ﺍﻟﺪﺭ ..
ﺍﻟﺤﻠﻘﺔ ﺍﻟﺘﺎﻧﻴﺔ
ﺑﻌﺪ ﺍﻟﺸﻠﻪ ﺍﺗﻔﺮﺗﻘﺖ .. ﻭﻛﻞ ﺯﻭﻝ ﻣﺸﻰ ﻋﻠﻰ ﺍﻫﻠﻪ..
ﺍﻟﺠﻴﻠﻲ ﻣﺸﻰ ﺍﻟﺒﻴﺖ .. ﻭﻟﻘﻰ ﻧﺎﺱ ﺍﻟﺒﻴﺖ ﻧﺎﻳﻤﻴﻦ ..
ﻭﺻﻔﻴﻪ ﻗﺎﻋﺪﻩ ﻓﻲ ﺍﻻﻭﺿﻪ ﺍﻟﻘﺪﺍﻡ ﺗﺬﺍﻛﺮ ﺑﻲ ﺍﻟﻠﻤﺒﻪ ﺍﻡ
ﺷﺒﻚ .. ﻣﺸﻰ ﻟﻴﻬﺎ ﻭﻗﺎﻝ ﻟﻴﻬﺎ .. ﺻﻔﻴﻪ ﻭﺍﻟﻠﻪ ﺍﻧﺎ ﺟﻴﻌﺎﻥ
ﺟﻮﻋﺔ .. ﻗﻮﻣﻲ ﺷﻮﻓﻲ ﻟﻲ ﺣﺎﺟﺔ ﺍﻛﻠﻬﺎ .. ﻗﺎﻟﺖ ﻟﻴﻬﻮ
ﻋﺸﺎﻙ ﻗﺎﻋﺪ.. ﺩﻗﺎﻳﻖ ﺑﺲ .. ﻫﺴﻊ ﺑﺠﻴﺒﻮ ﻟﻴﻚ ﺧﺘﺖ ﺍﻟﻘﻠﻢ
ﻓﻲ ﻧﺺ ﺍﻟﻜﺘﺎﺏ ﻭﻗﻔﻠﺖ ﺍﻟﻜﺘﺎﺏ ﻋﺸﺎﻥ ﺍﻟﺼﻔﺤﺔ ..
ﻭﻗﺎﻣﺖ ﺟﺎﺑﺘﻠﻮ ﺍﻟﻔﻄﻴﺮ ﺑﻲ ﺍﻟﻠﺒﻦ .. ﻓﻲ ﺻﺤﻦ ﻃﻠﺲ
ﺍﺑﻴﺾ.. ﻭﻛﻮﺯ ﺍﻟﻤﻮﻳﻪ ﻭﻛﻮﺭﻳﺔ ﺍﻟﻠﺒﻦ ﻛﻠﻬﻦ ﻓﻲ ﺍﻟﺼﻴﻨﻴﻪ..
ﻭﺧﺘﺖ ﻟﻴﻬﻮ ﺍﻟﺼﻴﻨﻴﺔ ﻓﻮﻕ ﺍﻟﺴﺠﺎﺩﺓ .. ﻭﻗﺎﻟﺖ ﻟﻴﻬﻮ ﺍﻫﺎ
ﻗﻮﻡ ..
ﻗﺎﻡ ﺷﺎﻝ ﺍﻟﻜﻮﺯ ﻭﻣﺮﻕ ﺑﺮﻩ ﻏﺴﻞ ﺍﻳﺪﻭ ﻭﺟﺎ ﻗﻌﺪ ﻳﺎﻛﻞ
ﻭﻫﻲ ﻓﺘﺤﺖ ﻛﺘﺎﺑﻬﺎ ﻭﺭﺟﻌﺖ ﺗﻘﺮﺍ
..ﻗﺎﻟﻬﺎ ﻳﺎﺻﻔﻴﻪ ﻣﺎﻛﻤﻠﺘﻲ ﻣﺰﺍﻛﺮﺗﻚ؟ .. ﻗﺎﻟﺖ ﻟﻴﻬﻮ ﺧﻼﺹ
ﺩﻱ ﺍﺧﺮ ﺻﻔﺤﺔ ﺳﻜﺖ ﺳﺎﻱ ﻭﺑﻘﻰ ﻳﺎﻛﻞ ﺑﻌﺪ ﻛﻤﻞ ﺍﻛﻠﻪ
ﻭﻏﻄﻰ ﺍﻟﺼﺤﻦ ﺑﺎﻟﻄﺒﻖ ﺭﺍﺟﻊ ..ﻗﺎﻡ ﻏﺴﻞ ﻭﺟﺎ ﻗﻌﺪ
ﺭﺍﺟﻊ ﻭﻫﻲ ﺑﻘﺖ ﺗﻘﻔﻞ ﻓﻲ ﻛﺘﺒﻬﺎ ﻗﺎﻟﺖ ﻟﻴﻬﻮ.. ﻇﻨﻲ ﺍﻟﻠﻴﻠﻪ
ﻳﺎ ﺍﻟﺠﻴﻠﻲ ﻋﻨﺪﻙ ﻣﻌﺎﻱ ﻛﻼﻡ ..
..ﻗﺎﻝ ﻟﻴﻬﺎ ﺻﺪﻗﺘﻲ .. ﺩﺍﻳﺮ ﺍﺳﺎﻟﻚ .. ﺍﻧﺎ ﻭﺍﻟﻠﻪ ﺑﺪﺭﻳﻪ ﺑﺖ ﺍﺣﻤﺪ
ﺩﻱ ﻋﺎﺟﺒﺎﻧﻲ ﻋﺠﺐ ..ﺑﺎﻗﻲ ﻟﻚ ﻛﺎﻥ ﻗﻠﺖ ﺩﺍﻳﺮﻫﺎ ﺑﺪﻭﻧﻲ
ﻟﻴﻬﺎ ؟ ﻗﻌﺪﺕ ﺗﻀﺤﻚ ..ﻗﺎﻝ ﻟﻬﺎ ﻣﺎﻟﻚ ﺁﺻﻔﻴﻪ؟ .. ﻗﺎﻟﺖ ﻟﻴﻬﻮ
ﺍﻟﺘﻘﻮﻝ ﺍﻧﺘﻮ ﻣﺘﻮﺍﺻﻴﻦ .. ﺍﻟﺒﺖ ﺩﻱ ﻗﺪﺕ ﺍﺿﺎﻧﻲ .. ﻛﻞ ﻳﻮﻡ
ﺗﻘﻮﻝ ﻟﻲ ﺍﻧﺎ ﺍﻥ ﺑﻘﻰ ﻣﺎﻋﺮﺳﺖ ﺍﻟﺠﻴﻠﻲ ﺍﻥ ﺷﺎ ﺍﻟﻠﻪ
ﺍﻣﻮﺕ .. ﻭﻛﻞ ﻳﻮﻡ ﺑﺘﺴﺎﻟﻨﻲ ..ﺗﻘﻮﻝ ﻟﻲ ﺍﻟﺠﻴﻠﻲ ﻣﺎﻗﺎﻋﺪ
ﻳﺠﻴﺐ ﺳﻴﺮﺗﻲ؟. ﺍﻟﺠﻴﻠﻲ ﻭﻳﻦ؟ ﺍﻟﺠﻴﻠﻲ ﻛﻴﻒ؟ ﻛﺎﻥ ﺟﻴﺖ
ﺩﺍﺧﻞ ﺳﺎﻱ ﻭﻫﻲ ﻣﻌﺎﻱ ..ﺗﻘﻮﻝ ﻟﻲ ﺍﻟﺠﻴﻠﻲ ﺍﻛﻞ ؟
ﺍﻟﺠﻴﻠﻲ ﻓﻄﺮ؟ ﻭﺣﺎﺕ ﺍﻟﻠﻪ ﺍﻧﺖ ﻋﺎﺟﺒﻬﺎ ﻋﺠﺐ ﺷﺪﻳﺪ.. ﺑﺲ
ﺍﻧﺎ ﻣﺎﻗﺎﻳﻼﻙ ﺷﻐﺎﻝ ﺑﺎﻟﻤﻮﺿﻮﻉ ﻭﻻﺟﺎﻳﺐ ﻟﻮ ﺧﺒﺮ ﺍﻟﻠﺘﺎﺭﻳﻜﻢ
ﺍﻻﺗﻨﻴﻦ ﻣﻮﺟﻌﻴﻦ ﻫﻬﻬﻬﻬﻪ
..ﻗﺎﻟﻬﺎ ﻋﻠﻴﻚ ﺍﻟﻠﻪ ﻳﺎ ﺻﻔﻴﻪ ﺑﺎﻟﺼﺢ؟.
ﻗﺎﻟﺖ ﻟﻴﻬﻮ ﻭﺍﻟﻠﻪ ﻣﻨﺎﻫﺎ ﻓﻲ ﺍﻟﺪﻧﻴﺎ ﺍﻟﺠﻴﻠﻲ.. ﻭﻳﻮﻡ ﻗﺎﻟﺖ ﺍﻧﺎ
ﻟﻮ ﻣﺎ ﺍﺗﺰﻭﺟﺖ ﺍﻟﺠﻴﻠﻲ .. ﻣﺎﺑﺰﻭﺝ ﻧﻬﺎﺋﻲ .. ﻭﻳﻮﻡ ﻗﺎﻟﺖ ﻟﻲ
ﻛﺎﻥ ﺍﻟﺠﻴﻠﻲ ﻳﻮﻡ ﻓﻜﺮ ﻳﺨﻄﺐ ﺍﻱ ﻭﺍﺣﺪﺓ ﻏﻴﺮﻱ
ﻛﻠﻤﻴﻬﻮ .. ﻭﻗﻮﻟﻲ ﻟﻲ ﺑﺪﺭﻳﺔ ﺑﺘﻨﺘﺤﺮ ﻫﻬﻬﻪ .. ﻗﺎﻝ ﻟﻴﻬﺎ ﻭﺍﻟﻠﻪ
ﺟﺪ؟
ﺍﻟﺰﻭﻝ ﻗﺎﻡ ﻣﻦ ﺍﻟﻤﻔﺮﺷﻪ ﻭﺑﻘﻰ ﻻﻑ ﻓﻲ ﺍﻻﻭﺿﺔ ﺯﻱ
ﺍﻟﻤﻠﺪﻭﻍ ..ﻭﻳﻔﺮﻙ ﻓﻲ ﺍﻳﺪﻳﻬﻮ ﻭﻳﻘﻮﻝ .. ﻟﻜﻦ ﺑﺎﻗﻲ ﻟﻚ
ﺑﺪﻭﻧﻲ ﻟﻴﻬﺎ ؟ ﻣﺎﻣﻤﻜﻦ .. ﻣﺴﺘﺤﻴﻞ .. ﺩﻩ ﻋﺸﻢ ﺍﺑﻠﻴﺲ ﻓﻲ
ﺍﻟﺠﻨﺔ .. ﻭﺻﻔﻴﻪ ﺧﺎﺗﻪ ﺍﻳﺪﻫﺎ ﻓﻮﻕ ﺧﺸﻤﻬﺎ ﻭﺗﻌﺎﻳﻦ ﻟﻴﻬﻮ ..
ﻣﺸﻰ ﻃﻠﻊ ﻋﻠﻰ ﺍﻟﺪﻳﻮﺍﻥ ﻃﻮﺍﻟﻲ ..ﻫﻨﺎﻙ ﻣﺤﻞ ﻧﻮﻣﻪ .
ﻟﻜﻦ ﺍﻟﻠﻴﻞ ﻛﻠﻮ ﻣﺎﻫﺠﺲ ﻻﻏﻤﺪ ﻻﻧﻌﺲ . ﻭﺗﻔﻜﻴﺮﻭ ﻛﻠﻪ
ﻓﻲ ﺑﺪﻭﺭ .. ﻭﺧﻴﺎﻟﻮ ﺑﺪﻭﺭ .. ﺑﺪﺭﻳﻪ .
ﻭﺍﻟﺼﺒﺎﺡ ﻗﺎﻡ (ﻓﺮﺗﺮﺏ ) . ﺍﻟﺘﻘﻮﻝ ﻣﺎﻛﺎﻥ ﻣﺴﺎﻫﺮ .. ﻳﺼﻔﺮ
ﻭﻳﻐﻨﻲ ﻭﻣﺮﺓ ﻳﺪﻭﺑﻲ .. ﻭﺭﻛﺐ ﻭﻧﺰﻝ ﻋﻠﻰ ﺍﻟﺰﺭﺍﻋﺔ .. ﻭﺩﻩ
ﻛﺎﻥ ﺍﺟﻤﻞ ﻳﻮﻡ ﻣﺮﺓ ﻋﻠﻴﻬﻮ ﻓﻲ ﺍﻳﺎﻡ ﺣﻴﺎﺗﻪ ..
ﻭﺧﻠﺺ ﺷﻐﻠﻪ ﻭﺟﺎ ﺭﺍﺟﻊ . ﻓﻄﺮ ﻭﺍﺧﺪ ﻧﻮﻣﺔ ﻛﺪﺍ
ﺧﻔﺎﻓﻴﻪ . ﻭﺍﻟﻀﻬﺮﻳﺔ ﻛﺪﺍ ﺳﻤﻊ ﺻﻮﺕ ﺑﺪﺭﻳﺔ ﺟﺎﺕ ﻟﻲ
ﺻﻔﻴﻪ .. ﻭﻗﺎﻋﺪﺓ ﻣﻌﺎﻫﺎ ﻓﻲ ﺍﻻﻭﺿﺔ ﺍﻟﻘﺪﺍﻡ .
ﻟﻜﻦ ﺧﺠﻞ ﺍﺑﺎ ﻳﻤﺸﻲ ﻋﻠﻴﻬﻦ .. ﺑﻘﻰ ﻳﺘﺒﺴﻢ ﺑﺮﺍﻫﻮ ..
ﻭﻛﺎﻥ ﻫﻦ ﺑﺘﻮﻧﺴﻦ ﺑﻲ ﻧﻔﺲ ﺍﻟﻤﻮﺿﻮﻉ .. ﻭﺻﻔﻴﺔ ﺣﻜﺖ
ﻟﻲ (ﺑﺪﻭﺭ ) ﻛﻞ ﺍﻟﺤﺼﻞ ﺍﻣﺒﺎﺭﺡ ..
ﻭﺑﺪﺭﻳﺔ ﺑﺮﺿﻮ ﻋﺎﻳﺰﺓ ﺗﻄﻴﺮ ﻣﻦ ﺍﻟﻔﺮﺡ .. ﻭﻗﺎﻟﺖ ﻟﻴﻬﺎ ﺍﻧﺎ
ﻣﺎﺷﻪ ﺍﻛﻠﻢ ﺍﻣﻲ ﻳﺎﺻﻔﻴﻪ .. ﺍﻧﺎ ﻓﺮﺣﺎﻧﺔ ﺷﺪﻳﺪ ﻳﺎﺻﻔﻴﺔ ..
ﺍﻣﻬﺎ ﺳﻌﺎﺩ ﺑﺖ ﺍﻟﻌﻤﺪﺓ ﻳﻮﺳﻒ .. ﺑﺮﺿﻬﺎ ﺍﺑﻮﻫﺎ ﻛﺎﻥ ﻋﻤﺪﺓ
ﺑﻠﺪ ﻭﻣﺮﺑﻴﺔ ﻓﻮﻕ ﺍﻟﻐﻨﻰ ﻭﺍﻟﻨﻌﻴﻢ ﻭﻣﺘﺰﻭﺟﺔ ﺭﺍﺟﻞ ﻣﻦ
ﺍﻋﻴﺎﻥ ﺍﻟﺒﻠﺪ .. ﻭﺍﻟﺒﻨﻴﺔ ﺑﺪﺭﻳﺔ ﺭﺑﺎﻧﺔ ﻓﻮﻕ ﺍﻟﺒﻄﺮ ﻭﺍﻟﻨﻐﻨﻐﺔ ..
ﻭﻧﺎﺍﺍﺍﺍﺍﻋﻤﺔ ﺍﻟﻨﺴﻴﻢ ﻛﺎﻥ ﻣﺮﺍ ﻓﻮﻗﺎ ﻳﺠﺮﺡ ﺧﺪﻭﺩﻫﺎ ..
ﻭﻣﺎﻫﻮ ﺷﻲ ﺟﺎﻳﻴﻬﺎ ﺟﺪﻳﺪ ﻣﻮﺭﻭﺙ ﻛﺎﺑﺮﻥ ﻋﻦ ﻛﺎﺑﺮ ..
ﻭﻣﺎﻫﺎ ﻣﺴﺘﺠﺪﺓ ﻧﻌﻤﺔ ..
ﺍﻫﺎ ﺍﻣﻬﺎ ﺩﻱ ﻣﺮﺓ ﻗﻮﻣﺎﺑﻴﻪ .. ﻭﻣﺮﺓ ﻓﻨﺠﺮﻳﺔ .. ﻭﺍﻟﺰﻭﻝ
ﺍﻟﺰﻱ ﺍﻟﺠﻴﻠﻲ ﺩﻩ ﻓﻲ ﺍﻟﺸﺎﺭﻉ ﻣﺎﺑﺴﻠﻤﻮﺍ ﻋﻠﻴﻬﻮ ﺍﻟﻨﺎﺱ
ﺩﻳﻞ ..
ﺍﻟﺒﺖ ﻣﺎﺷﺔ ﺗﻜﻠﻢ ﺍﻣﻬﺎ ﺗﻘﻮﻟﻬﺎ ﺻﻔﻴﺔ ﻗﺎﻟﺖ ﺍﻟﺠﻴﻠﻲ ﺍﺧﻮﻫﺎ
ﻗﺎﻝ ﺩﺍﻳﺮﻧﻲ ..
ﻭﻗﺪﺭ ﻣﺎ ﺻﻔﻴﺔ ﺍﻗﻨﻌﺖ ﺍﻟﺒﺖ ﻭﻗﺎﻟﺖ ﻟﻴﻬﺎ ﻣﺎﺗﺴﺘﻌﺠﻠﻲ ..
ﻭﺍﺻﺒﺮﻱ ﺷﻮﻳﺔ .. ﺑﺪﺭﻳﺔ ﻗﺎﻟﺖ ﻟﻴﻬﺎ ﺍﻭﻻ ﺍﻧﺎ ﺍﻣﻲ ﻻﺯﻡ
ﺍﻛﻠﻤﻬﺎ ﺑﺎﻱ ﺣﺎﺟﺔ ﻭﻫﻲ ﺑﺘﻜﻠﻢ ﺍﺑﻮﻱ .. ﻋﺸﺎﻥ ﻣﺎ ﺍﻛﻮﻥ
ﺑﺴﻮﻱ ﻟﻲ ﻓﻲ ﺣﺎﺟﺔ ﺍﻫﻠﻲ ﻣﺎﻋﺎﺭﻓﻨﻬﺎ ..
ﺑﻌﺪﻳﻦ ﻳﺎﺻﻔﻴﺔ ﻋﺸﺎﻥ ﻣﺎﻳﺠﻲ ﺯﻭﻝ ﻳﻄﻠﺒﻨﻲ ﻣﻦ ﺍﺑﻮﻱ
ﻭﺍﺑﻮﻱ ﻃﻮﺍﻟﻲ ﻳﺪﻳﻬﻮ
ﺍﺣﺴﻦ ﺍﺑﻮﻱ ﻳﻌﺮﻑ ﺍﻧﻲ ﻋﻨﺪﻱ ﺯﻭﻝ ﻋﺎﻳﺰﺍﻫﻮ .. ﻭﺗﺎﻧﻲ
ﺍﻟﻴﺤﺼﻞ ﻳﺤﺼﻞ ..
ﻭﻃﺒﻌﺎ ﺍﺑﻮﻫﺎ ﺩﺍ ﺯﻭﻝ ﺻﻌﺐ ﺻﻌﻮﺑﻴﺔ ﺷﺪﻳﺪﺓ ﺧﻼﺹ ..
ﻳﺎﺧﻲ ﺩﻩ ﻗﺎﻟﻮ ﻭﻛﺖ ﻳﻜﻮﻥ ﻓﻲ ﺍﺟﺘﻤﺎﻉ .. ﻭﺍﻟﻨﺎﺱ
ﺗﺘﻨﺎﻗﺶ ﻭﻫﻮ ﻳﻜﻮﻥ ﻣﺎﻓﻴﺶ .. ﺍﻟﻨﺎﺱ ﻛﻠﻬﺎ ﺗﻘﻮﻝ ﻣﺎﺩﺍﻡ
ﺍﻟﺰﻋﻴﻢ ﺍﺣﻤﺪ ﻣﺎﻓﻴﺶ ﺷﻮﺭﺗﻜﻢ ﻣﺎﺑﺘﻢ .. ﻭﻫﻮ ﻟﻤﻦ ﻳﻜﻮﻥ
ﻗﺎﻋﺪ .. ﻓﺪ ﻧﻬﺮﺓ ﺑﺴﻜﺖ ﺍﻟﺮﺟﺎﻝ ﺟﺖ .. ﻭﻓﻲ ﺍﻟﻨﻬﺎﻳﻪ ﺭﺍﻳﻮ
ﻫﻮ ﺍﻟﺒﻤﺸﻲ .. ﻭﻛﺖ ﻳﺠﻲ ﻓﻲ ﻧﺎﺱ ﺍﻟﺠﻮﺩﻳﺔ ﺍﻫﻞ ﺍﻟﻜﺘﻴﻞ
ﺑﻌﻔﻮ ﺍﻟﺮﻗﺒﻪ ﺍﻛﺮﺍﻡ ﻟﻴﻬﻮ ﻭﻫﻴﺒﺔ ﺣﻀﻮﺭﻭ .. ﻻﻧﻪ ﺑﺎﻟﺠﺪ ﺯﻭﻝ
ﻗﺎﺳﻴﻪ .. ﻭﻓﺎﺭﺳﺎ " ﻋﻴﻨﻮ ﺣﻤﺮﺓ ..
ﻭﺍﻟﻠﻴﻠﻪ ﺣﻴﺼﻠﻮ ﺍﻟﺨﺒﺮ ﺍﻧﻮ ﺍﻟﺠﻴﻠﻲ .. ﺩﺍﻳﺮ ﻳﻌﺮﺱ ﺑﺘﻮ
ﺑﺪﺭﻳﺔ .. ﺍﺻﻼ ﺍﻟﺰﻋﻴﻢ ﻋﻨﺪﻭ ﺑﺘﻴﻦ .. ﻟﻴﻠﻰ ﻣﺘﺰﻭﺟﺔ ﻣﻦ
ﺯﻭﻝ ﺭﺟﻞ ﺍﻋﻤﺎﻝ ﻭﺳﺎﻛﻨﺔ ﺍﻟﺨﺮﻃﻮﻡ .. ﻭﺑﺪﺭﻳﺔ ﺩﻱ ..
ﻭﻋﻨﺪﻭ ﻭﻟﺪ ﻭﺍﺣﺪ ﻓﻲ ﺍﻟﻴﺎﺑﺎﻥ .. ﻟﻴﻬﻮ 12 ﺳﻨﺔ ..
ﻳﻼ ﺑﺪﺭﻳﺔ ﻣﺼﺮﺓ ﺗﻤﺸﻲ ﺗﻔﺖ ﺍﻟﻤﻮﺿﻮﻉ .
( ﻭﺍﻟﻜﻼﻡ ﺩﺧﻞ ﺍﻟﺤﻮﻭﻭﻭﺵ ) .