ضيــــــــــــــــــــــــــاع الدرح15

ﺿﻴــﺎﻉ ﺍﻟﺪﺭ ..
ﺍﻟﺤﻠﻘﺔ 15 ....
ﺍﻟﺠﻮﺍﺏ ﺍﻟﺮﺳﻠﻮ ﻧﺎﺻﺮ ﻭﺻﻞ ﺑﻌﺪ 6 ﺍﻳﺎﻡ ﻟﻲ ﺍﻟﺨﺮﻃﻮﻡ ..
ﻭﺳﻠﻤﻮﻩ ﻻﺧﻮ ﻧﺎﺻﺮ .. ﻭﻗﺮﺍﻫﻮ ﻛﻠﻪ .. ﻭﻛﺎﻥ ﺑﺘﻮﻧﺲ ﻣﻊ ﺍﺻﺤﺎﺑﻮ ..
ﻭﻗﺮﺍ ﻟﻴﻬﻢ ﺍﻟﺠﻮﺍﺏ ﻛﺎﻣﻞ .. ﻭﻃﺒﻌﺎ ﻧﺎﺱ ﺑﻴﺖ ﺍﻟﻌﺰﺍﺑﺔ ﻛﻠﻬﻢ ﻋﺎﺭﻓﻴﻦ ﻗﺼﺔ
ﺍﻟﺠﻴﻠﻲ ﻣﻊ ﺑﺖ ﺍﻟﺰﻋﻴﻢ ﺍﺣﻤﺪ .. ﻭﻋﺎﺭﻓﻴﻦ ﻗﺼﺔ ﻣﻌﺘﺼﻢ ﻣﻊ ﺍﻟﺰﻋﻴﻢ ﻭﺍﻱ
ﺣﺎﺟﺔ .. ﻃﺒﻌﺎ ﺍﻟﻮﻟﺪ ﺍﻟﺠﺎﻫﻮ ﺍﻟﺠﻮﺍﺏ .. ﺍﻟﻠﻬﻮ ﺍﺧﻮ . ﻧﺎﺻﺮ ﻗﺎﻝ ﻟﻬﻢ ﻭﺍﻟﻠﻪ
ﻟﻮ ﺍﻟﺨﺒﺮ ﺩﻩ ﻭﺻﻞ ﺍﻟﺰﻋﻴﻢ ﺗﺎﻧﻲ ﺍﻟﺠﻴﻠﻲ ..ﺑﺪﺭﻳﺔ ﺍﻻ ﻳﺸﻤﻬﺎ ﻗﺪﺣﺔ .. ﻭﺩﻱ
ﺍﻣﻨﻴﺔ ﺍﻟﻮﺩ ﻣﻌﺘﺼﻢ .. ﺑﺲ ﻳﺎﺟﻤﺎﻋﺔ ﻻﺯﻡ ﻧﺘﻜﺘﻢ ﻋﻠﻰ ﺍﻟﺨﺒﺮ .. ﻻﻧﻮ ﺍﻟﺠﻴﻠﻲ
ﺑﺴﺘﺎﻫﻞ ﻛﻞ ﺧﻴﺮ ..
ﺍﻫﺎ ﻓﻲ ﻭﺍﺣﺪ ﻣﻦ ﺍﻟﻌﺰﺍﺑﺔ ﻣﻦ ﻧﺎﺱ ﺍﻟﺒﻠﺪ .. ﺯﻭﻝ ﺿﻤﻴﺮﻭ ﻭﺳﺨﺎﻥ ..
ﻭﻣﻔﻠﺲ ﻭﺗﺎﺭﻙ ﺻﻼﺓ .. ﺍﺳﻤﻮ ﺑﻠﻮﻟﻪ ﺑﻘﻮﻟﻮﻟﻮ ( ﺍﻟﺪﺣﻴﺶ ) .. ﺍﻫﺎ ﺍﻟﺪﺣﻴﺶ
ﻗﺎﻝ ﻟﻴﻬﻢ .. ﺍﻧﺘﻮ ﻣﻌﺘﺼﻢ ﺩﻩ ﻣﻨﻮ؟؟ ﺍﻧﺎ ﻣﺎﻋﺮﻓﺘﻮ .. ﻗﺎﻟﻮ ﻟﻴﻬﻮ ﻳﺎﺧﻲ
ﻣﻌﺘﺼﻢ ﻭﺩ ﻓﻼﻥ ﺍﻟﻔﻼﻧﻲ ﺍﻟﻤﺸﻬﻮﺭ ﺩﻩ .. ﻋﻨﺪﻫﻢ ﻋﻤﺎﺭﺓ ﻓﻲ ﺍﻟﺴﻮﻕ ﺍﻟﻌﺮﺑﻲ
ﺟﻨﺐ ﺍﻟﻬﻨﺎﻱ ﺩﺍﻙ .
ﻭﻋﻨﺪﻫﻢ ﺍﻣﻼﻙ ﻭﻣﺼﺎﻧﻊ .. ﻫﻢ ﺯﺍﺗﻮ ﺭﺿﻮ ﺑﻲ ﻳﻤﺸﻮ ﻳﻌﺮﺳﻮ ﻣﻦ ﺍﻟﺒﻠﺪ
ﻟﻴﻪ؟؟ ﻧﺤﻦ ﻣﺴﺘﻐﺮﺑﻴﻦ .. ﻳﻼ ﺍﻟﻮﻟﺪ ﺧﺖ ﺟﻮﺍﺑﻮ ﺍﻟﺮﺳﻠﻮ ﻟﻴﻬﻮ ﺍﺧﻮﻫﻮ ﻓﻲ
ﺍﻟﺸﻨﻄﺔ ﺑﺘﺎﻋﺘﻮ ..
ﻭﻃﺒﻌﺎ " ﺷﻨﻂ ﺍﻟﻌﺰﺍﺑﺔ ﺑﺘﻜﻮﻥ ﺗﺤﺖ ﺍﻟﺴﺮﺍﻳﺮ ﻭﻣﺎ ﻣﻘﻔﻮﻟﺔ ..
ﺍﻫﺎ ﻳﺎﺯﻭﻝ .. ﺍﻟﺪﺣﻴﺶ ﺍﻟﻤﻨﺤﻮﺱ ﺧﻼ ﺭﻓﺎﻗﺘﻮ ﻣﺸﻮ ﺍﻟﺸﻐﻞ ..
ﻭﺑﺮﺍﺣﻪ ﻓﺘﺢ ﺍﻟﺸﻨﻄﻪ ﻭﺷﺎﻝ ﺍﻟﺠﻮﺍﺏ ﻣﻦ ﺷﻨﻄﺔ ﺍﻟﻮﻟﺪ ﻭﻣﺮﻕ ..
ﻣﺸﻰ ﺍﻟﺴﻮﻕ ﺍﻟﻌﺮﺑﻲ ﻟﻠﻌﻤﺎﺭﺓ ..ﻭﺳﺄﻝ ﻧﺎﺱ ﺍﻟﺪﻛﺎﻛﻴﻦ ﺍﻟﻤﺆﺟﺮﻳﻦ ..
ﺑﺴﺄﻝ ﻓﻴﻬﻢ ﻣﻦ ﻣﻌﺘﺼﻢ ﻳﻠﻘﺎﻫﻮ ﻭﻳﻦ ؟ .. ﻭﺻﻔﻮ ﻟﻴﻬﻮ ﺍﻟﻤﻜﺘﺐ ﺣﻘﻮ ﻓﻲ ﺷﺎﺭﻉ
ﺍﻟﺠﻤﻬﻮﺭﻳﺔ .. ﻣﺸﻰ ﻟﻴﻬﻮ ﻃﻮﺍﻟﻲ .. ﻭﻗﺎﻝ ﻟﻠﺤﺎﺭﺱ .. ﻗﻮﻟﻴﻬﻮ ﻓﻲ ﺯﻭﻝ
ﻣﺮﺳﻞ ﻣﻦ ﺑﺪﺭﻳﺔ ﺑﺖ ﺍﺣﻤﺪ ..
ﺍﻭﻝ ﻣﺎ ﺍﻟﺤﺎﺭﺱ ﻛﻠﻢ ﻣﻌﺘﺼﻢ .. ﻭﺟﺎﺏ ﻟﻴﻬﻮ ﺳﻴﺮﺓ ﺑﺪﺭﻳﻪ .. ﻣﻌﺘﺼﻢ ﻗﺎﻝ
ﻟﻴﻬﻮ ﺑﺴﺮﻋﺔ ﺧﻠﻴﻬﻮ ﻳﺪﺧﻞ .. ﺩﺧﻞ ﺍﻟﺪﺣﻴﺶ ﻋﻠﻰ ﻣﻌﺘﺼﻢ . ﻭﻗﺎﻝ ﻟﻴﻬﻮ ..
ﻛﻴﻒ ﺍﻟﺤﺎﻝ ﻳﺎ ﺍﺳﺘﺎﺫ ﻣﻌﺘﺼﻢ ؟ ﻃﺒﻌﺎ " ﺍﻧﺖ ﻣﺎﺑﺘﻌﺮﻓﻨﻲ ﻟﻜﻦ ﺍﻧﺎ ﺑﻌﺮﻓﻚ ..
ﻭﻋﺎﺭﻑ ﻣﻨﺎﻙ ﻓﻲ ﺍﻟﺪﻧﻴﺎ ﺗﺘﺰﻭﺝ ﺑﺪﺭﻳﺔ ﺑﺖ ﺍﺣﻤﺪ ﺻﺎﺍﺍﺡ؟ ﻗﺎﻝ ﻟﻴﻬﻮ ﺍﻳﻮﺓ
ﻧﻌﻢ .. ﻗﺎﻝ ﻟﻴﻬﻮ ﺍﻧﺎ ﻟﻮ ﻓﺘﺤﺖ ﻟﻴﻚ ﻃﺮﻳﻖ ﺗﻌﺮﺳﻬﺎ ﻓﻲ ﺍﻟﻴﻮﻣﻴﻦ ﺩﻳﻞ ..
ﺑﺘﺪﻳﻨﻲ ﻛﻢ؟
ﻗﺎﻝ ﻟﻴﻬﻮ ﺍﻧﺖ ﺗﺘﻤﻨﻰ .. ﻭﺍﻟﺒﺘﺘﻤﻨﺎﻫﻮ ﺑﺪﻳﻚ ﻟﻴﻬﻮ .. ﺑﺲ ﺑﻌﺪ ﺗﺄﻛﺪ ﻟﻲ
ﻛﻼﻣﻚ ﺑﺎﻟﺪﻟﻴﻞ ﺍﻧﻮ ﺣﻘﻴﻘﺔ ..
ﺍﻟﺪﺣﻴﺶ ﻗﺎﻝ ﻟﻴﻬﻮ .. ﺍﻧﺎ ﻣﻮﺍﻓﻖ .. ﺍﻧﺎ ﺯﻭﻝ ﺑﻮﺯﻉ ﺍﻟﻌﻴﺶ .. ﺑﺸﻴﻞ ﻣﻦ
ﺍﻟﻔﺮﻥ ﻟﻠﺪﻛﺎﻛﻴﻦ .. ﺑﺲ ﺩﺍﻳﺮ ﻋﺠﻠﺔ ﺣﻤﺎﻟﺔ .. ( ﻧﻮﻉ ﺍﻟﺪﺭﺍﺟﺔ ﺍﻟﺒﺨﺘﻮ ﻓﻴﻬﺎ
ﺍﻟﻄﺎﻭﻟﺔ ﻗﺪﺍﻡ ﻓﻴﻬﺎ ﺯﻱ ﺳﺒﺖ ﻛﺪﺍ )
ﺍﻟﻤﻬﻢ ﻣﻌﺘﺼﻢ .. ﻗﺎﻝ ﻟﻴﻬﻮ ﺍﻧﺎ ﻣﻮﺍﻓﻖ .. ﻫﺴﻲ ﺑﺪﻳﻚ ﺍﻟﻘﺮﻭﺵ . ﻭﺗﻤﺸﻲ
ﺗﺸﺘﺮﻳﻬﺎ ﺟﺪﻳﺪﺓ ﻛﺮﺕ ﺑﺲ ﻗﻮﻝ ﻟﻲ ﺍﻟﺤﺎﺻﻞ ﺷﻨﻮ؟
ﻗﺎﻝ ﻟﻴﻬﻮ .. ﺍﻟﺠﻴﻠﻲ ﺍﻟﻤﺘﻜﻠﻢ ﻓﻲ ﺍﻟﺒﺖ ﺍﻻﻧﺖ ﺩﺍﻳﺮﻫﺎ .. ﻗﺎﻝ ﻟﻴﻬﻮ ﻣﺎﻟﻮ؟
( ﻃﺒﻌﺎ " ﻣﻌﺘﺼﻢ ﻋﺎﺭﻑ ﻗﺼﺔ ﺍﻧﻮ ﺍﻟﺠﻴﻠﻲ ﻃﺎﻟﺐ ﺑﺪﺭﻳﻪ ﻟﻜﻦ ﺍﻫﻠﻪ ﻣﺎﻋﺎﺭﻓﻴﻦ )
ﺍﻟﺪﺣﻴﺶ ﻗﺎﻝ ﻟﻴﻬﻮ ﺍﻟﺰﻭﻝ ﺩﻩ ﻳﺎﻣﻌﺘﺼﻢ . ﻣﺴﺠﻮﻥ ﻓﻲ ﺍﻟﺴﻌﻮﺩﻳﺔ ﻓﻲ ﻗﻀﻴﺔ
ﻣﺨﺪﺭﺍﺕ ..
ﻭﻟﻮ ﺍﻟﺰﻋﻴﻢ ﻋﺮﻑ ﺍﻟﻤﻮﺿﻮﻉ ﺩﻩ .. ﺑﻔﺴﺦ ﻭﻋﺪﻩ ﻣﻌﺎﻫﻮ .. ﻭﺍﻧﺖ ﻃﺮﻳﻘﻚ
ﺑﻜﻮﻥ ﺳﺎﻟﻚ ..
ﻣﻌﺘﺼﻢ ﻗﺎﻝ ﻟﻴﻬﻮ .. ﺑﺲ ﺍﻟﺪﻟﻴﻞ ﻋﻠﻰ ﻛﻼﻣﻚ ﺩﻩ ﺷﻨﻮ؟ ﻭﺍﻧﺎ ﺃﺗﺄﻛﺪ ﻛﻴﻒ ﺍﻧﻮ
ﺩﻩ ﺣﺼﻞ ..
ﻗﺎﻝ ﻟﻴﻬﻮ .. ﺍﺗﻔﻀﻞ ﺍﻗﺮﺍ ﺍﻟﺠﻮﺍﺏ ﺩﻩ .. ﻣﺮﺳﻠﻮ ﻭﺍﺣﺪ ﺻﺪﻳﻖ ﺍﻟﺠﻴﻠﻲ ﺷﻐﺎﻝ
ﻓﻲ ﺍﻟﺴﻌﻮﺩﻳﺔ ﻟﻲ ﺍﺧﻮﻫﻮ .. ﻭﻓﻴﻬﻮ ﺍﻟﻜﻼﻡ ﺑﺎﻟﻨﺺ ..
ﻣﻌﺘﺼﻢ ﻣﺴﻚ ﻗﺮﺍ ﺍﻟﺠﻮﺍﺏ ﻭﻭﻗﻒ ﻋﻠﻰ ﺣﻴﻠﻮ ﻭﻗﺎﻝ .. (ﺍﻟﻠﻴﻠﺔ ﻳﺎ
ﺍﻟﺮﺍﻛﻮﺑﺔ .. ﻣﻦ ﺍﻟﺼﺒﺎﺡ ﻣﺨﺮﻭﺑﻪ ) ..
ﻭﺷﺎﻝ ﻣﻨﻮ ﺍﻟﺠﻮﺍﺏ .. ﻭﻋﺪﺍ ﻟﻴﻬﻮ ﻗﺮﻭﺵ ﺗﻤﻦ ﺍﻟﻌﺠﻠﺔ .. 50 ﺟﻨﻴﻪ ﻭﺭﻕ
ﺟﻨﻴﻬﺎﺕ ﺟﺪﺍﺍﺍﺍﺍﺍﺩ ﺍﻟﺠﻨﻴﻪ ﻳﺤﻚ ﺍﻟﺠﻨﻴﻪ .. ﺍﻟﻌﺠﻠﺔ ﺩﻱ ﻛﺎﻧﺖ ﻓﻲ ﺍﻟﻮﻛﺖ ﺩﺍﻙ
ﺏ 50 ﺟﻨﻴﻪ .
( ﻳﻌﻨﻲ ﺍﻟﻜﺒﺮﻳﺘﺔ ﺍﻟﻠﻴﻠﻪ . ﺑﻲ ﺗﻤﻦ ﺍﺭﺑﻌﺔ ﻋﺠﻼﺕ ﻓﻲ ﺍﻟﺰﻣﻦ ﺩﺍﻙ .. ﻻﻧﻮ
ﺍﻟﻜﺒﺮﻳﺘﺔ ﻫﺴﻲ ﻳﻮﻡ ﻛﺘﺎﺑﺔ ﺍﻟﺮﻭﺍﻳﺔ ﺩﻱ ﺑﻲ 200 ﺟﻨﻴﻪ ) .. ..
ﺍﻟﻤـــﻬﻢ .. ﻣﻌﺘﺼﻢ ﺍﺳﺘﻠﻢ ﺍﻟﺠﻮﺍﺏ .. ﺍﻟﺠﻮﺍﺏ ﺍﻟﻠﻬﻮ ﻣﺨﺮﺟﻮ ﺍﻟﻮﺣﻴﺪ ..
ﻭﺍﻣﻠﻮ ﺍﻟﻤﺮﺗﺠﻲ .
ﻭﻓﺮﺡ ﻓﺮﺡ ﻗﻌﺪ ﻳﻨﻄﻂ ﺯﻱ ﺍﻟﻘﺮﺩ ..
ﻭﺍﻟﺪﺣﻴﺶ ﺷﺎﻝ ﺍﻟﻘﺮﻭﺵ ﻭﻣﺸﻰ .. ﻭﻃﻮﺍﻟﻲ ﻋﻠﻰ ﻣﺤﻞ ﺍﻟﻌﺠﻼﺕ ..
ﻭﺍﺷﺘﺮﻯ ﺍﻟﻌﺠﻠﺔ .. ﻭﻭﺩﺍﻫﺎ ﺑﻴﺖ ﺍﻟﻌﺰﺍﺑﻪ .. ﻟﻤﻦ ﺳﺄﻟﻮﻫﻮ ﻗﺎﻝ ﺍﺷﺘﺮﺍﻫﺎ ﻟﻲ
ﺃﺧﻮﻱ .. ﻭﺍﻟﻮﺩ ﺍﺧﻮ ﻧﺎﺻﺮ ﻛﺎﺱ ﻟﻠﺠﻮﺍﺏ .. ﻭﻣﺎﻟﻘﺎﻫﻮ ﻭﻣﺎﺭﺑﻂ ﺍﺑﺪﺍ " ﺑﻴﻦ
( ﻏﻴﺎﺏ ﺍﻟﺠﻮﺍﺏ ﻭﺣﻀﻮﺭ ﺍﻟﻌﺠﻠﺔ .. ) ....ــــــــ
ﺑﺎﻛﺮ ﺍﻟﺼﺒﺎﺡ ﺑﺪﺭﻱ .. ﻣﻌﺘﺼﻢ ﻗﺎﻝ ﻻﺑﻮﻫﻮ ﺍﻧﺎ ﻋﻨﺪﻱ ﺳﻔﺮﻳﺔ ﺻﻐﻴﺮﺓ
ﻭﺟﺎﻱ ..
ﻭﻣﺸﻰ ﻃﺒﻌﺎ ﺭﻛﺐ ﻋﺮﺑﻴﺘﻮ ﺍﻟﺨﺎﺻﺔ .. ﻭﺳﺎﻓﺮ ﺍﻟﺒﻠﺪ ﺑﺮﺍﺍﻫﻮ ﺍﻟﻠﻪ ﻭﺭﻗﺒﺘﻮ ..
ﻭﻟﻤﻦ ﻭﺻﻞ .. ﻭﻗﻒ ﻋﺮﺑﻴﺘﻮ ﺍﻟﺠﺪﻳﺪﺓ ﻗﺪﺍﻡ ﺩﻳﻮﺍﻥ ﺍﻟﺰﻋﻴﻢ .. ﻭﻟﻘﻰ ﺍﻟﺰﻋﻴﻢ
ﻗﺎﻋﺪ .. ﻭﻣﻌﺎﻫﻮ ﺟﻤﺎﻋﺔ ﻣﻦ ﺯﻋﻤﺎﺀ ﺍﻟﺒﻠﺪ . ﺟﺎﻳﻴﻦ ﻟﻤﻮﺿﻮﻉ ﺑﺘﺎﻉ ﺗﺒﺮﻋﺎﺕ ..
ﻭﺍﻟﺰﻋﻴﻢ ﺭﺣﺐ ﺑﻴﻬﻮ ﺷﺪﻳﺪ .. ﻣﻊ ﺍﻧﻮ ﺍﺳﺘﻐﺮﺏ ﻓﻲ ﺍﻟﺰﻳﺎﺭﺓ ﺍﻟﻐﺮﻳﺒﺔ ﺩﻱ ..
ﻭﻓﻲ ﺍﻟﻮﻟﺪ ﺍﻟﺠﺎﻱ ﺑﺮﺍﻫﻮ ﻭﺟﺎﻱ ﻣﺨﻠﻮﻉ ﻛﺪﻱ ﻣﺎﻟﻮ ..
ﺍﻫﺎ ﻗﺎﻝ ﻟﻴﻬﻮ ﻳﺎﻋﻤﻲ ﺍﺣﻤﺪ .. ﺍﻧﺎ ﻣﺴﺘﻌﺠﻞ ﻻﻧﻲ ﺭﺍﺟﻊ ﻫﺴﻲ .. ﺑﺲ ﺩﺍﻳﺮﻙ
ﻓﻲ ﻛﻠﻤﺘﻴﻦ ..
ﻭﻣﻮﺿﻮﻉ ﺿﺮﻭﺭﻱ ﻭﻣﺎ ﺑﺄﺧﺮﻙ .. ﻗﺎﻝ ﻟﻴﻬﻮ ﻳﺎﻭﻟﺪﻱ ﻗﻮﻝ ﺑﺴﻢ ﺍﻟﻠﻪ .. ﺍﻧﺖ
ﻫﺴﻊ ﺟﻴﺖ ﻣﺘﻴﻦ. ؟ ﻗﺎﻝ ﻟﻴﻬﻮ ﺑﺲ ﺍﻧﺖ ﺗﻌﺎﻝ ﻟﻲ ﻭﺑﻌﺪﻳﻦ ﻧﺸﻮﻑ ..
ﺍﻟﻤﻬﻢ . ﺩﺧﻞ ﻣﻌﺎﻫﻮ ﺟﻮﻩ ..
ﻗﺎﻝ ﻟﻴﻬﻮ ﻭﺍﻟﻠﻪ ﻳﺎﻋﻢ ﺍﺣﻤﺪ .. ﺍﻧﺎ ﻛﻨﺖ ﻣﻨﺘﻈﺮ ﺍﻟﻤﻮﺍﻋﻴﺪ ﺍﻟﻘﻠﺘﻬﺎ ﻟﻲ ..
ﻭﻋﺮﻓﺖ ﻣﻦ ﺍﻟﻨﺎﺱ ﺍﻧﻚ ﺍﻧﺖ ﻣﻨﺘﻈﺮ ﺯﻭﻝ ﺍﺩﻳﺘﻮ ﻛﻠﻤﺔ ﺑﺸﺮﻭﻁ ﻟﻔﺘﺮﺓ ﺯﻣﻨﻴﺔ
ﻣﺤﺪﺩﻩ ..
ﻭﺍﻟﺰﻭﻝ ﺍﻟﻠﻬﻮ ﺍﻟﺠﻴﻠﻲ .. ﻟﻜﻦ ﻳﺎﻋﻢ ﺍﻟﺠﻴﻠﻲ ﺧﺴﺎﺭﺓ ﺗﻨﺘﻈﺮ ﺍﻟﺰﻭﻝ ﺩﻩ ..
ﺍﻟﺰﻭﻝ ﺩﻩ ﻭﻛﺖ ﻣﺸﻰ ﺍﻟﺴﻌﻮﺩﻳﺔ .. ﻭﻋﺮﻑ ﺍﻧﻮ ﻣﺎﺑﻘﺪﺭ ﻳﻮﻓﻲ ﺍﻟﺘﺰﺍﻣﺎﺕ
ﺍﻟﺰﻭﺍﺝ ﺍﻻﻧﺖ ﺍﺷﺘﺮﻃﻬﺎ ﻋﻠﻴﻬﻮ ..
ﻣﺸﻰ ﻳﺒﺎﺭﻱ ﻓﻲ ﻃﺮﻕ ﺧﻄﺮﺓ ﻭﻣﺤﺮﻣﻪ ..ﻋﺸﺎﻥ ﻳﺠﻤﻊ ﻣﺎﻝ ﻛﺘﻴﺮ ﻓﻲ ﺯﻣﻦ
ﻗﺼﻴﺮ .. ﻭﻳﻮﻓﻲ ﻃﻠﺒﺎﺗﻚ ﻭﻳﺘﺰﻭﺝ ﺑﺘﻚ ..
ﺍﻟﺰﻋﻴﻢ ﻗﺎﻝ ﻟﻴﻬﻮ ﻳﺎﻭﻟﺪﻱ ﺑﻮﻇﺖ ﺍﻋﺼﺎﺑﻲ ﺑﻲ ﻛﻼﻣﻚ ﺩﻩ ..ﻗﻮﻝ ﻛﻼﻣﻚ ﻋﺪﻳﻞ
ﻭﺭﻳﺤﻨﺎ ..
ﻣﻌﺘﺼﻢ ﻗﺎﻝ ﻟﻴﻬﻮ .. ﺍﻟﺠﻴﻠﻲ ﺃﺷﺘﻐﻞ ﻓﻲ ﺗﺠﺎﺭﺓ ﺍﻟﻤﺨﺪﺭﺍﺕ .. ﻟﻜﻦ ﺍﺗﻘﺒﺾ
ﻭﻫﺴﻊ ﻣﺴﺠﻮﻥ ﻓﻲ ﺟﺪﺓ ..
ﺍﻟﺰﻋﻴﻢ ﻗﺎﻝ ﻟﻴﻬﻮ ﺍﺳﻤﻊ .. ﺍﻧﺎ ﺑﺼﺪﻕ ﺍﻟﻜﻼﻡ ﺩﻩ ﻓﻲ ﺍﻱ ﺯﻭﻝ .. ﺍﻻ ﻓﻲ
ﺍﻟﺠﻴﻠﻲ ..
ﺍﻟﺠﻴﻠﻲ ﺍﻧﺎ ﺑﻌﺮﻓﻮ ﻣﻦ ﺷﺎﻓﻊ .. ﺩﻩ ﻛﻼﻡ ﻛﺬﺏ ﺍﻟﻘﺎﻝ ﻟﻴﻚ ﻣﻨﻮ ؟؟ ..
ﻣﻌﺘﺼﻢ ﻗﺎﻝ ﻟﻴﻬﻮ ﺑﺘﻌﺮﻑ ﻧﺎﺻﺮ ﻭﺩ ﻓﻼﻥ ﻭﺩ ﻓﻼﻥ ..
ﻗﺎﻝ ﻟﻴﻬﻮ ﺍﻳﻮﺓ ..ﺩﻩ ﻭﻟﺪﻧﺎ ﻣﻦ ﺍﻟﺤﻠﺔ .. ﻭﺷﻐﺎﻝ ﻓﻲ ﺍﻟﺴﻌﻮﺩﻳﺔ ﻓﻲ ﺟﺪﺓ
ﻓﻌﻼ ".. ﺃﻫﺎ ﻣﺎﻟﻮ ؟
ﻗﺎﻝ ﻟﻴﻬﻮ ﺍﻟﺰﻭﻝ ﺩﻩ ﻳﺎﻋﻢ ﺍﺣﻤﺪ .. ﺭﺳﻞ ﺟﻮﺍﺏ ﻻﺧﻮﻩ ﺍﻟﻔﻲ ﺍﻟﺨﺮﻃﻮﻡ ..
ﻭﺣﻜﺎ ﻟﻴﻬﻮ ﻓﻴﻬﻮ ﻛﻞ ﺣﺎﺟﺔ ..
ﻭﺍﻟﺠﻮﺍﺏ ﻣﻌﺎﺍﺍﺍﺍﺍﺍﺍﺍﺍﺍﻱ .. ﺍﻟﺰﻋﻴﻢ ﻗﺎﻝ ﻟﻴﻬﻮ ﺳﻠﻤﻨﻲ ﺍﻟﺠﻮﺍﺏ ﻛﺎﻥ ﺻﺎﺡ؟
ﻣﻌﺘﺼﻢ ﻃﻠﻊ ﺍﻟﺠﻮﺍﺏ ﻭﺳﻠﻤﻮ ﻟﺤﺎﺝ ﺃﺣﻤﺪ ..
ﺍﻟﻰ ﺍﻟﻠﻘﺎﺀ