لُـ‘ـُــــــــــــــۅعُـ‘ـُة قُـ‘ـُلُـ‘ـُـــــــــبُـ‘ـُ
مرحبا بـــــــــك في منتديات لوعــــــــة قلب
Welcome to the Forum for anguish of the hear

نتمنى لك ان تجد كل ما يسعدك


وشكرا (حمادة)

لُـ‘ـُــــــــــــــۅعُـ‘ـُة قُـ‘ـُلُـ‘ـُـــــــــبُـ‘ـُ

ﻧﺤﻦ ﻻ ﻧﻜﺘﺐ ﻟﻜﻲ ﻧﺴﻤﻊ ﺍﻟﺘﺼﻔﻴﻖ ﻭﻟﺴﻨﺎ ﻣﺠﺮﺩ منتدى ﺯﺍﺋﺪﺓ ﻋﻠﻰ الانترنت , ﻧﺤﻦ ﻫﻮﺍﺀٌ ﻳُﺘﻨﻔﺲ, ﻭﺃﺣﻼﻡٌ ﺗﺮﺍﻓﻘﻚ ﺩﺍﺋﻤﺎ
 
الرئيسيةاليوميةس .و .جبحـثالتسجيلدخول

شاطر | 
 

 ضيــــــــــــــــــــــــــاع الدر ح23

اذهب الى الأسفل 
كاتب الموضوعرسالة
hmadakhan
مدير منتديات لوعة قلب
مدير منتديات لوعة قلب
avatar

عدد المساهمات : 108
تاريخ التسجيل : 31/01/2012
العمر : 22
الموقع : الخرطوم/الحاج يوسف/شارع واحد

مُساهمةموضوع: ضيــــــــــــــــــــــــــاع الدر ح23   الأحد أبريل 27, 2014 9:17 am

ﺿﻴﺎﻉ ﺍﻟﺪﺭ ..
ﺍﻟﺤﻠﻘﻪ 23 ....
ﺍﻟﺠﻴﻠﻲ ﺑﺴﻤﻊ ﻓﻲ ﻓﻲ ﺍﺣﺴﺎﻥ .. ﺑﺎﻧﺘﺒﺎﻩ ﻭﺗﺮﻛﻴﺰ ﻭﻣﺸﺎﻋﺮ
ﻣﺨﺘﻠﻄﺔ .. ﺍﺳﺘﻐﺮﺍﺏ .. ﻭﺷﻔﻘﺔ .. ﻭﺧﻮﻑ .. ﻭﻓﺮﺡ .. ﻟﻤﻦ ﺍﺗﺼﺒﺐ ﺑﺎﻟﻌﺮﻕ
ﻭﺍﻟﻮﺍﻃﻪ ﺑﺮﺩ ﻃﺒﻌﺎ ﻧﺤﻦ ﻓﻲ ﺷﻬﺮ ﻭﺍﺣﺪ ﻭﺍﻟﺒﺮﺩ ﺯﻳﻔﺔ .. ﺑﻌﺪ ﺧﻠﺼﺖ ﺷﺎﻝ
ﻧﻔﺴﻮ ﻭﺧﺘﺎﻫﻮ .. ﻭﻗﺎﻝ ﻟﻬﺎ .. ﺭﺑﻨﺎ ﻳﺠﺰﻳﻚ ﺧﻴﺮ .. ﻳﺎ ﺍﺣﺴﺎﻥ ﻭﺍﻧﺘﻲ ﻣﺎ
ﻣﺸﺤﻮﺩﻩ .. ﺍﻟﺤﺎﻝ ﺷﺮﻳﻚ ﺍﻟﻮﺍﻟﺪ .. ﻭﺍﻟﻤﻮﺿﻮﻉ ﺑﺘﺎﻉ ﺍﻟﺰﻋﻴﻢ ﻭﺍﻫﻠﻬﺎ ﺩﻩ ..
ﻣﻮﺿﻮﻉ ﺑﺴﻴﻂ .. ﻓﻲ ﺍﻟﻨﻬﺎﻳﺔ ﺣﻴﺴﻮﻭ ﻟﻴﻚ ﺷﻨﻮ ﻳﻌﻨﻲ؟ .. ﺍﻟﻤﻬﻢ ﺍﻧﺘﻲ
ﻋﻤﻠﺘﻲ
ﺍﻟﺼﺢ.. ﻭﻣﻦ ﺍﺣﻴﺎﻫﺎ ﻓﻜﺎﻧﻤﺎ ﺍﺣﻴﺎ ﺍﻟﻨﺎﺱ ﺟﻤﻴﻌﺎ "
ﺍﻟﻤﻮﺿﻮﻉ ﺩﻩ ﺧﻠﻴﻬﻮ ﻋﻠﻲ .. ﻗﺎﻟﺖ ﻟﻴﻬﻮ ﺧﺶ ﺷﻮﻑ ﺑﺪﺭﻳﺔ ﺍﺣﺘﻤﺎﻝ ﻟﻤﺔ
ﺗﺸﻮﻓﻚ .. ﺗﺮﺟﻊ ﻟﻄﺒﻴﻌﺘﻬﺎ.. ﻗﺎﻝ ﻟﻴﻬﺎ : ﻻﻻﻻ .. ﺍﻧﺎ ﻣﺸﺘﺎﻕ ﺍﺷﻮﻓﺎ ﻟﻤﻦ
ﺣﺎﺱ ﺭﻭﺣﻲ ﺩﺍﻳﺮﻩ ﺗﻤﺮﻕ .. ﻟﻜﻦ ﺩﻩ ﻣﺎﻭﻛﺘﻮ .. ﺍﻧﺎ ﺩﺍﻳﺮ ﺍﻫﻠﻬﺎ ﻳﺸﻮﻓﻮﻫﺎ ﺑﻲ
ﺣﺎﻟﺘﻬﺎ .. ﻋﺸﺎﻥ ﻳﻌﺬﺭﻭﻫﺎ ﻭﻣﺎﻳﻠﻮﻣﻮﻫﺎ ﻭﻻﻳﺄﺫﻭﻫﺎ ﺑﻲ ﺍﻱ ﻛﻼﻡ .. ﺑﻌﺪﻳﻦ
ﻋﻼﺟﻬﺎ ﻫﻴﻦ ﺍﻥ ﺷﺎﺀ ﺍﻟﻠﻪ ﺍﻧﺘﻲ ﺑﺲ ﻗﻮﻟﻲ ﻳﺎﺭﺏ .. ﻗﺎﻟﺖ ﻟﻴﻬﻮ .. ﺭﺑﻨﺎ ﻳﻜﻤﻠﻚ
ﺑﻲ ﻋﻘﻠﻚ ﻳﺎ ﺍﻟﺠﻴﻠﻲ ..
ﺧﻼﺹ ﺍﻧﺖ ﺣﺘﻌﻤﻞ ﺷﻨﻮ ؟ ﻗﺎﻝ ﻟﻴﻬﺎ ﺍﻧﺖ ﺍﺻﺒﺮﻱ ﻭﺑﺘﺸﻮﻓﻲ .. ﻫﺴﻊ ﺍﺩﻳﻨﻲ
ﺣﺎﺟﺔ ﺍﻛﻠﻬﺎ ﺍﻧﺎ ﺍﻟﺠﻮﻉ ﻫﻠﻜﻨﻲ ﻫﻼﻙ .. ﻗﺎﻟﺖ ﻟﻴﻬﻮ ﺑﺲ ﺧﻤﺲ ﺩﻗﺎﻳﻖ ..
ﻫﺒﻠﺖ ﺍﻟﺼﺎﺝ .. ﺩﻓﻘﺖ ﻓﻮﻗﻮ ﺍﻟﻌﺠﻴﻦ .. ﻭﻗﻠﺒﺖ ﻟﻴﻬﻮ ﻗﺮﺍﺻﺔ ﺑﻮﺧﻬﺎ ﻳﻠﻮﻱ ..
ﻭﻛﺒﺖ ﻟﻴﻬﻮ ﻓﻮﻗﺎ ﺭﻭﺏ ﻣﺸﻠﻬﺐ .. ﺍﻛﻞ ﻓﻀﻠﺔ ﺧﻴﺮﻛﻢ .. ﻟﻤﻦ ﺣﺲ ﺍﻟﻌﺎﻓﻴﺔ
ﺩﺑﺖ ﻓﻲ ﺟﺴﻤﻮ ..ﺷﺮﺏ ﺍﺍﻣﻮﻳﺔ ﻭﻏﺴﻞ ﺍﻳﺪﻳﻬﻮ ﻭﻓﺮﻛﻦ ﻛﺪﺍ ﻭﻗﺎﻝ ﺍﻟﻠﻬﻢ
ﺍﺟﻌﻠﻬﺎ ﻧﻌﻤﺔ ﻭﺍﺣﻔﻈﻬﺎ ﻣﻦ ﺍﻟﺰﻭﺍﻝ ﺍﻫﺎ ﻳﺎ ﺍﺣﺴﺎﻥ ﺍﻧﺎ ﻣﺎﺷﻲ ﻭﻧﺸﻮﻑ
ﺍﻟﺒﺴﻮﻳﻬﺎ ﺭﺑﻨﺎ .. ﻗﺎﻟﺖ ﻟﻴﻬﻮ ﺍﻣﺶ ﻟﻮﺩ ﺍﻟﻠﺤﻤﺮ ﺑﺘﻠﻘﺎﻫﻮ ﻓﻲ ﺍﻟﺸﺪﺭ
ﺍﻟﻘﺪﺍﻣﻲ .. ﺍﺭﻛﺐ ﻣﻌﺎﻫﻮ ﻳﻮﺻﻠﻚ .. ﻗﺎﻝ ﻻﻻ .. ﺍﻧﺎ ﺑﻤﺸﻲ ﻛﺪﺍﺭﻱ ﺳﺎﻱ ..
ﻋﺸﺎﻥ ﺍﻗﺪﺭ ﺍﻓﺮﻍ ﻃﺎﻗﺔ ﺍﻟﻔﺮﺣﺔ ﺩﻱ ﺣﺎﺳﻲ ﺍﻧﻲ ﺩﺍﻳﺮ ﺍﻧﺸﻖ ﻧﺼﻴﻦ ..
ﺍﻭﻝ ﻣﺎ ﻭﺻﻞ ﺍﻟﺤﻠﺔ ﻣﺎ ﻣﺸﻰ ﻟﻠﺪﻳﻮﺍﻥ ﺑﺘﺎﻉ ﺍﻟﺰﻋﻴﻢ .. ﻣﺸﻰ ﻟﻲ ﺍﻡ ﺑﺪﺭﻳﺔ
ﻭﻗﺎﻝ ﻟﻴﻬﺎ ﻛﻴﻒ ﺍﺣﻮﺍﻟﻚ .. ﺍﻧﺎﻣﻦ ﻳﻮﻡ ﻋﺰﻳﺘﻚ ﺗﺎﻧﻲ ﻣﺎ ﺍﺗﻼﻗﻴﻨﺎ .. ﻗﺎﻟﺖ ﻟﻴﻬﻮ
ﺳﺎﻣﻌﺔ ﺑﻴﻚ ﻳﺎﻭﻟﺪﻱ ..ﺣﺎﻳﻢ ﺍﻟﺤﻼﻝ ﺣﻠﺔ ﺣﻠﺔ .. ﻭﺧﻠﻴﺘﻨﺎ ﻣﺘﺸﻜﻜﻴﻦ ﻓﻲ ﻣﻮﺕ
ﺑﺪﺭﻳﺔ .. ﺑﻲ ﺳﺒﺐ ﺍﻟﺨﺒﺮ ﺍﻟﺠﺒﺘﻮ ﻣﻦ ﺍﻟﺮﺑﺎﻃﺎﺏ ..
ﻗﺎﻝ ﻟﻴﻬﺎ ﻣﻤﻜﻦ ﺗﻨﺎﺍﺩﻱ ﻟﻲ ﺣﺎﺝ ﺍﺣﻤﺪ ﺩﺍﻳﺮ ﺍﺗﻜﻠﻢ ﻣﻌﺎﻛﻢ ﺷﻮﻳﺔ ﻗﺒﻞ ﻣﺎ
ﺃﺳﺎﻓﺮ .. ﻭﻳﻜﻮﻥ ﺍﻟﻜﻼﻡ ﺩﻩ ﺑﺮﺍﻧﺎ ﺍﻟﺘﻼﺗﺔ ﺑﺲ .. ﻗﺎﻟﺖ ﻟﻴﻬﻮ ﺧﻮﻓﺘﻨﻲ ﻳﺎ
ﺍﻟﺠﻴﻠﻲ ﻓﻲ ﺷﻨﻮ .. ﺑﺪﺭﻳﺔ ﻣﻨﻬﺎ ﺧﺒﺮ؟
ﻗﺎﻝ ﻟﻴﻬﺎ ﺑﺪﺭﻳﺔ ﺿﻴﻌﺘﻮﻫﺎ ﺑﺮﺍﻛﻢ ﺗﺴﺄﻟﻴﻨﻲ ﻣﻨﻬﺎ ﺃﻧﺎ؟ ﻧﺎﺩﻳﻬﻮ ﻟﻲ ..
ﺍﻟﻤﻬﻢ ﺭﺳﻠﺖ ﻟﻠﺰﻋﻴﻢ . ﻭﺟﺎﺀ ﻣﺘﻠﻤﻠﻢ ﻭﺷﺎﻳﻞ ﻋﺼﺎﺗﻮ .. ﻗﺎﻝ ﺍﻟﺠﻴﻠﻲ؟ ﺍﻟﺠﻴﻠﻲ
ﺩﻩ ﺍﻟﺠﺎﺑﻮ ﺟﻮﺓ ﺷﻨﻮ؟ ﺍﻟﺰﻭﻝ ﺩﻩ ﻣﺎﺑﺪﺧﻞ ﻋﻠﻰ ﺍﻟﺤﺮﻳﻢ ﺍﻻ ﻟﻤﻮﺿﻮﻉ ﺧﻄﻴﺮ ..
ﺍﻟﺠﻴﻠﻲ ﻗﺎﻝ ﻟﻴﻬﻮ ﺍﺗﻔﻀﻞ ﻳﺎﺣﺎﺝ .. ﺍﻟﺒﻴﺖ ﻛﺎﻥ ﻓﺎﺿﻲ ﻭﺍﻟﻮﻛﺖ ﺯﻱ ﺣﺪﺍﺷﺮ
ﺿﻬﺮ 12 ﻛﺪﺍ
ﺍﻟﺰﻋﻴﻢ ﻗﻌﺪ .. ﻗﺎﻝ ﻟﻴﻬﻮ ﻳﺎ ﺣﺎﺝ ﺍﺣﻤﺪ ﺍﻧﺖ .. ﻣﺎﺣﻔﻈﺖ ﻟﻲ ﺍﻻﻣﺎﻧﺔ ﺍﻻﻧﺎ
ﺍﻣﻨﺘﻚ ﻟﻴﻬﺎ ..
ﺍﻧﺎ ﺳﺎﻓﺮﺕ ﻣﻨﻚ ﻭﺍﻧﺖ ﻋﺎﻫﺪﺗﻨﻲ ﺍﻧﻲ ﺍﻭﻓﻲ ﺷﺮﻭﻃﻲ ﻭﺍﺟﻴﻚ ﺍﻟﻘﻰ ﺍﻣﺎﻧﺘﻲ
ﻣﻮﺟﻮﺩﺓ ﻋﻨﺪﻙ .. ﺍﺟﻲ ﺍﻟﻘﺎﻫﺎ ﺳﺒﺐ ﺣﻴﺎﺗﻲ ﻣﺎﻓﻲ ﻭﻳﻘﻮﻟﻮ ﻟﻲ ﻏﺮﻗﺖ ..
ﻭﻓﻲ ﺍﻟﻨﻬﺎﻳﺔ ﺍﻛﺘﺸﻒ ﺍﻧﻬﺎ ﺿﺎﻳﻌﺔ ﻭﻣﺎﻣﻌﺮﻭﻑ ﺍﻟﺤﺎﺻﻞ ﻟﻴﻬﺎ ﺷﻨﻮ ﻭﺍﻧﺘﻮ
ﻋﺎﻳﺸﻴﻦ ﻓﻲ ﺍﻣﻮﺭ ﺿﻠﻤﻪ ..
ﻳﺎﺣﺎﺝ ﺍﺣﻤﺪ ﺍﻧﺖ ﺍﻟﺒﺖ ﻟﻤﻦ ﻗﺎﻟﺖ ﻟﻴﻚ ﺍﻧﺎ ﻣﺎﻋﺎﻳﺰﺓ ﺍﺗﺰﻭﺝ ﺍﻟﺰﻭﻝ ﺩﻩ ﻟﻴﻪ
ﺗﺠﺒﺮﻫﺎ ؟؟ ﻭﻛﻤﺎﻥ ﺗﻘﻮﻝ ﺍﻧﺘﺤﺮﻱ ﺍﺷﺮﺑﻲ ﺻﺒﻐﺔ ﺍﻗﻌﻲ ﺍﻟﺒﺤﺮ .. ؟؟ ﻭﺍﻧﺖ
ﻋﺎﺭﻑ ﺑﺪﺭﻳﺔ ﻭﻗﻮﺓ ﺭﺍﺳﻬﺎ ﻭﺣﻤﺎﻗﺘﻬﺎ ..
ﻭﻻ ﻧﺎﺳﻲ ﺍﻧﻬﺎ ﺩﻱ ﺑﺘﻚ ﻭﻣﺎﺧﺪﻩ ﻃﺒﺎﻳﻌﻚ ؟ ﺍﻧﺖ ﻋﺎﺭﻑ ﺍﻧﻚ ﺍﻧﺖ ﺍﻟﺴﺒﺐ ﻓﻲ
ﻣﻮﺕ ﺑﺪﺭﻳﺔ ﻟﻮ ﻣﺎﺗﺖ ﻭﺍﻧﺖ ﺍﻟﺴﺒﺐ ﻓﻲ ﺿﻴﺎﻋﻬﺎ ﻟﻮ ﺿﺎﻋﺖ ؟
ﻭﺍﻧﺘﻲ ﻳﺎﺣﺠﻪ .. ﻣﺎﺣﺮﺍﻡ ﻋﻠﻴﻚ ﺗﻘﻮﻟﻲ ﻟﻴﻬﺎ ﻣﻮﺗﻲ ﻭﺍﻧﺘﺤﺮﻱ ﺑﻌﺪ ﺗﻌﺮﺳﻲ؟
ﻣﻌﻘﻮﻝ ﻧﺎﺱ ﻋﻨﺪﻫﻢ ﺩﺭﺓ ﺯﻱ ﺑﺪﺭﻳﺔ ﻳﻀﻴﻌﻮﻫﺎ ﺑﺎﻟﻄﺮﻳﻘﺔ ﺩﻱ ؟ ﺍﻟﺰﻋﻴﻢ ﻳﺴﻤﻊ
ﻣﺪﻧﻘﺮ .. ﻭﺍﻻﻡ ﺗﺸﺘﺖ ﻓﻲ ﺩﻣﻴﻌﺎﺗﻬﺎ ﻭﺳﺎﻛﺘﻴﻦ ﺑﺲ ..
ﻗﺎﻝ ﻟﻴﻬﻢ ﻋﻠﻰ ﻛﻞ ﺣﺎﻝ ﺣﺘﻰ ﻟﻮ ﺑﺪﺭﻳﺔ ﺍﺗﻠﻘﺖ ﺣﻴﺔ ﻫﻲ ﺗﺎﻧﻲ ﻣﺎﺑﺘﻜﻮﻥ
ﻣﺴﺆﻟﻴﺘﻜﻢ .. ﻭﺑﺘﻜﻮﻥ ﻣﺴﺆﻭﻟﻴﺔ ﺍﻟﺰﻭﻝ ﺍﻻﻧﻘﺬﻫﺎ ..
ﺍﻟﺤﻤﺪ ﻟﻠﻪ ﺍﻧﺎ ﻟﻘﻴﺖ ﺑﺪﺭﻳﺔ ﻭﻓﻲ ﻣﺮﺍﺓ ﺻﺎﻟﺤﺔ ﺍﻧﻘﺬﺗﻬﺎ ﻣﻦ ﺑﻴﻦ ﺍﻟﻤﻮﺟﺎﺕ
ﻭﻟﻘﺘﻬﺎ ﻓﻲ ﺍﻟﺒﺤﺮ ﺗﺼﺎﺭﻉ ﻓﻲ ﺍﻟﻤﻮﺕ ﻭﻃﻠﻌﺘﻬﺎ .. ﻭﺣﻔﻈﺘﻬﺎ ﻣﻦ ﺍﻟﻀﻴﺎﻉ ..
ﻟﻜﻦ ﻟﻼﺳﻒ ﺍﻟﻤﺮﺍﺓ ﻗﺎﻟﺖ ﺗﺎﻧﻲ ﻣﺎﺑﺘﺪﻳﻬﺎ ﺯﻭﻝ .. ﻭﻗﺎﻟﺖ ﻣﺎ ﺑﺘﺨﻠﻴﻜﻢ ﺗﺸﻮﻓﻮﻫﺎ
ﻧﻬﺎﺋﻲ ﻻﻧﻜﻢ ﻣﺎﺑﺘﺴﺘﺎﻫﻠﻮ .. ﺗﻜﻮﻥ ﻋﻨﺪﻛﻢ ﺑﺖ ﺯﻱ ﺑﺪﺭﻳﺔ ..
ﺍﻟﺰﻋﻴﻢ ﺭﻓﻊ ﺭﺍﺳﻮ ﻗﺎﻝ ﻟﻴﻬﻮ ﻋﻠﻴﻚ ﺍﻟﻠﻪ ﻳﺎ ﺍﻟﺠﻴﻠﻲ ﺍﻟﻜﻼﻡ ﺩﻩ ﺻﺤﻴﺢ؟
ﻋﻠﻴﻚ ﺍﻟﻠﻪ ﻳﺎ ﺍﻟﺠﻴﻠﻲ ﻣﺎﺗﺰﺭﻉ ﻓﻴﻨﺎ ﺍﻣﻞ ﻛﺎﺫﺏ .. ﺍﻧﺖ ﻣﺎﻋﺎﺭﻑ ﺍﻟﺤﺴﺮﺓ
ﻭﺍﻟﻨﺪﺍﻣﺔ ﺍﻟﺤﺎﺳﻲ ﺑﻴﻬﺎ ﺍﻧﺎ ﺟﻮﺍﻱ ..
ﻣﺎ ﻣﺸﻜﻠﺔ ﻳﺎ ﺍﻟﺠﻴﻠﻲ ﻧﺤﻦ ﺑﺲ ﻧﺘﺄﻛﺪ ﺍﻧﻬﺎ ﻛﻮﻳﺴﺔ ﻭﺳﻠﻴﻤﺔ ﻭﻧﺸﻮﻓﻬﺎ ..
ﻭﻧﻮﻋﺪﻙ ﺍﻧﻮ ﻣﺎ ﺣﻨﺴﻮﻗﻬﺎ ﻣﻦ ﺍﻟﻤﺮﺍﺓ ﺍﻟﻠﻘﺘﻬﺎ .. ﺑﺲ ﻋﻠﻲ ﺍﻻﻗﻞ ﻧﺸﻜﺮﻫﺎ
ﻋﻠﻰ ﻋﻤﻠﻴﺘﻬﺎ ..
ﻭﻧﻤﺸﻲ ﻣﻨﻬﺎ ﺍﻣﻬﺎ ﻗﺎﻟﺖ ﻟﻴﻬﻮ ﻛﻴﻒ ﻳﻌﻨﻲ ﻳﺎ ﺍﻟﺤﺎﺝ ؟ ﺍﻟﺒﺖ ﺑﺘﻨﺎ ؟ ﺍﻟﺠﻴﻠﻲ
ﻗﺎﻝ ﻟﻴﻬﺎ ﺑﺘﻜﻢ ؟ ﻭﻳﻨﻬﺎ؟؟ ﻭﺩﻳﺘﻮﻫﺎ ﻭﻳﻦ؟؟ ﺿﻴﻌﺘﻮﻫﺎ ﻟﻴﻪ؟ ﻳﺎ ﺣﺠﺔ ﻟﻮ ﺍﻟﺰﻭﻝ
ﻋﻨﺪﻩ ﺩﺭﺓ .. ﻭﺟﺪﻋﻬﺎ ﻓﻲ ﺍﻟﺒﺤﺮ .. ﻭﺧﻼﺹ ﺿﺎﻋﺖ ﻣﻨﻮ .. ﻭﻗﻨﻊ ﻣﻨﻬﺎ ﻭﺟﺎﺀ
ﺯﻭﻝ ﻓﺘﺶ ﻟﻴﻬﺎ ﻭﺷﺎﻟﻬﺎ .. ﻭﺍﺣﺘﻔﻆ ﺑﻴﻬﺎ .. ﺑﺼﺢ ﺳﻴﺪﻫﺎ ﺍﻻﻭﻝ ﻳﺠﻲ ﻳﻄﺎﻟﺐ
ﺑﻴﻬﺎ؟
ﻋﻠﻰ ﻛﻞ ..ﺍﻟﻤﻬﻢ ﻟﻼﺳﻒ .. ﺍﻧﺎ ﻣﺎﺑﻘﺪﺭ ﺍﻗﻮﻝ ﻟﻴﻜﻢ ..ﻻﻧﻲ ﻭﻋﺪﺕ ﺍﻟﻤﺮﺍﺓ..
ﺍﻻ ﻫﻲ ﺗﻮﺍﻓﻖ ..
.
ﻭﻟﻮ ﺑﺘﻮﻋﺪﻭﻧﻲ ﺍﻧﻜﻢ ﻣﺎ ﺣﺘﺎﺧﺪﻭﻫﺎ ﻣﻨﻬﺎ .. ﺍﻧﺎ ﺑﻤﺸﻲ ﺍﺳﺘﺄﺫﻥ ﻣﻨﻬﺎ ..
ﺗﺨﻠﻴﻜﻢ ﺗﺸﻮﻓﻮﻫﺎ ﻣﺮﺓ ﻭﺍﺣﺪﺓ .. ﻭﻟﻴﻌﻠﻤﻜﻢ .. ﺑﺪﺭﻳﺔ ﻋﻴﺎﻧﺔ ﻣﻦ ﻳﻮﻣﻬﺎ ﺍﻟﻮﻗﻌﺖ
ﺍﻟﺒﺤﺮ .. ﻭﻋﻘﻠﻬﺎ ﻣﺎﺭﺟﻊ ﻟﻴﻬﺎ ﺧﺎﻟﺺ ﻭﺍﺣﺘﻤﺎﻝ ﻟﻮ ﺷﺎﻓﺘﻜﻢ ﺣﺎﻟﺘﻬﺎ ﺗﺰﺩﺍﺩ ..
ﻻﻧﻜﻢ ﺍﻧﺘﻮ ﺍﻻﺗﻨﻴﻦ ﺳﺒﺐ ﻓﻲ ﺍﻟﺤﺎﺻﻞ ﺩﻩ ﻛﻠﻮ .. ﺍﻣﻬﺎ ﻗﺎﻟﺖ ﻟﻴﻬﻮ ﻋﻴﺎﻧﺔ
ﻣﺎﻟﻬﺎ .. ﻗﺎﻟﻴﻬﺎ ﺟﺎﺗﻬﺎ ﺣﺎﻟﺔ ﻧﻔﺴﻴﺔ ﻭﻛﻀﻤﺖ ﻣﺎ ﺑﺘﺘﻜﻠﻢ ﻧﻬﺎﺋﻲ ﻭﺳﺎﺭﺣﺔ
ﺑﺲ .. ﺍﻟﺰﻋﻴﻢ ﻗﺎﻝ ﻟﻴﻬﻮ ﺍﻧﺖ ﺷﻔﺘﻬﺎ ﺑﻲ ﻋﻴﻨﻚ ؟ ﺍﺣﺘﻤﺎﻝ ﺗﻜﻮﻥ ﻣﺎﺑﺪﺭﻳﻪ ..
ﺍﻟﺠﻴﻠﻲ ﻗﺎﻝ ﻟﻴﻬﻮ .. ﻻﻻ ﻳﺎﻫﺎ ﺑﺪﺭﻳﻪ ﺍﻧﺎ ﺑﻘﻮﻝ ﻛﻤﺎﻥ ﻟﻜﻢ ﻛﻼﻡ ﺯﻱ ﺩﻩ
ﻛﻀﺐ .. ﺍﻟﺰﻋﻴﻢ ﻗﺎﻝ ﻟﻴﻬﻮ ﺍﻣﺶ ﻛﻠﻤﻬﺎ ﻟﻴﻨﺎ ﻳﺎ ﺍﻟﺠﻴﻠﻲ ..
.
ﺍﻣﻬﺎ ﻗﺎﻟﺖ ﻟﻴﻬﻮ : ( ﺑﺲ ﺍﻭﻉ ﻳﻜﻮﻥ ﻏﺸﺘﻚ ﺍﺣﺴﺎﻥ ﺍﻟﻜﻀﺎﺑﺔ ﻭﻟﻌﺒﺖ
ﺑﻴﻚ ..!!!!!! .. )
ﻻﺣﻮﻝ ﻭﻻﻗﻮﺓ ﺍﻻ ﺑﺎﻟﻠﻪ .. ﺍﻟﺠﻴﻠﻲ ﺯﻧﻨﻨﻨﻨﻨﻨﻨﻨﻨﻨﻦ ﺭﺍﺳﻮ ﺿﺮﺏ ..
ﺧﺼﻮﺻﺎ " ﺍﻧﻮ ﻫﻮ ﻣﺎﺷﺎﻑ ﺑﺪﺭﻳﺔ .. ﻣﻌﻘﻮﻝ ﺍﺣﺴﺎﻥ ﻛﻀﺒﺖ ﻋﻠﻲ ؟؟ ﺍﻧﺎ ﻓﻌﻼ
"
ﻣﺎﺷﻔﺖ ﺑﺪﺭﻳﺔ .. ﺍﺿﻤﻦ ﻛﻴﻒ ﺍﻧﻬﺎ ﻣﻮﺟﻮﺩﺓ ﻳﺎﻟﻄﻴﻒ ﻳﺎﻟﻄﻴﻒ .. ﻣﻌﻨﺎﻫﺎ
ﺍﺣﺴﺎﻥ ﻣﺸﻬﻮﺭﺓ ﺑﺎﻟﻤﻘﺎﻟﺐ ..
ﻟﻜﻦ ﻳﺎﺭﺑﻲ ﻗﺼﺪﻫﺎ ﺑﺎﻟﻤﻘﻠﺐ ﺩﻩ ﺷﻨﻮ؟ ﻭﻟﻴﻪ ﻟﻮ ﺑﺘﻜﻀﺐ ﻗﺎﻟﺖ ﻟﻲ ﺗﻌﺎﻝ
ﺷﻮﻓﻬﺎ ؟
ﻭﺳﺘﻴﻦ ﺳﺆﺍﻝ ﺟﻮ ﻓﻲ ﺭﺍﺱ ﺍﻟﺠﻴﻠﻲ ﻓﻲ ﻟﺤﻈﺔ ﻭﺍﺣﺪﻩ .. ﻭﺧﻼﺹ ﻣﺨﻮ ﺩﺍﻳﺮ
ﻳﻄﺮﺷﻖ
الرجوع الى أعلى الصفحة اذهب الى الأسفل
http://loaaqlb.wwooww.net
 
ضيــــــــــــــــــــــــــاع الدر ح23
الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
لُـ‘ـُــــــــــــــۅعُـ‘ـُة قُـ‘ـُلُـ‘ـُـــــــــبُـ‘ـُ :: منتدى المنوعـــــــــات-
انتقل الى: