لُـ‘ـُــــــــــــــۅعُـ‘ـُة قُـ‘ـُلُـ‘ـُـــــــــبُـ‘ـُ
مرحبا بـــــــــك في منتديات لوعــــــــة قلب
Welcome to the Forum for anguish of the hear

نتمنى لك ان تجد كل ما يسعدك


وشكرا (حمادة)

لُـ‘ـُــــــــــــــۅعُـ‘ـُة قُـ‘ـُلُـ‘ـُـــــــــبُـ‘ـُ

ﻧﺤﻦ ﻻ ﻧﻜﺘﺐ ﻟﻜﻲ ﻧﺴﻤﻊ ﺍﻟﺘﺼﻔﻴﻖ ﻭﻟﺴﻨﺎ ﻣﺠﺮﺩ منتدى ﺯﺍﺋﺪﺓ ﻋﻠﻰ الانترنت , ﻧﺤﻦ ﻫﻮﺍﺀٌ ﻳُﺘﻨﻔﺲ, ﻭﺃﺣﻼﻡٌ ﺗﺮﺍﻓﻘﻚ ﺩﺍﺋﻤﺎ
 
الرئيسيةاليوميةس .و .جبحـثالتسجيلدخول

شاطر | 
 

 ضيــــــــــــــــــــــــــاع الدر ح20

اذهب الى الأسفل 
كاتب الموضوعرسالة
hmadakhan
مدير منتديات لوعة قلب
مدير منتديات لوعة قلب
avatar

عدد المساهمات : 108
تاريخ التسجيل : 31/01/2012
العمر : 22
الموقع : الخرطوم/الحاج يوسف/شارع واحد

مُساهمةموضوع: ضيــــــــــــــــــــــــــاع الدر ح20   الأحد أبريل 27, 2014 9:15 am

ﺿﻴﺎﻉ ﺍﻟﺪﺭ ..
ﺍﻟﺤﻠﻘﺔ 20 ..
ﺍﻟﺠﻴﻠﻲ ﻏﺸﻰ ﺑﺎﺏ ﺷﺮﻳﻒ ﻓﻲ ﺟﺪﻩ .. ﻭﺍﺷﺘﺮﻯ ﺍﻟﺸﻴﻠﺔ .. ﻭﻛﻞ ﻣﺎﻳﻠﺰﻡ
ﺗﺠﻬﻴﺰﺍﺗﻮ ..
ﻣﻊ ﺍﻧﻮ ﻣﺎﺿﺎﻣﻦ ﺍﻟﺒﺤﺼﻞ ﻫﻨﺎﻙ ﺷﻨﻮ؟ .. ﺍﻟﺰﻭﻝ ﺩﻩ ﺯﻭﻝ ﻏﺮﻳﺐ .. ﻭﻓﻬﻤﻮ
ﺷﻨﻮ ﺍﻧﺎ ﺣﻴﺮﻧﻲ ..
ﺍﻟﻤﻬﻢ ﻗﺎﻡ ﻭﺳﺎﻓﺮ ..ﻃﻮﻝ ﺍﻟﻄﺮﻳﻖ ﺳﺎﺭﺡ ﻓﻲ ﺍﻻﻓﻜﺎﺭ .. ﻭﻳﺘﺒﺴﻢ ﻭﺷﺎﻳﻒ
ﺍﻟﻄﺮﻳﻖ ﻃﻮﻳﻞ .. ﻭﺑﻔﻜﺮ ﺍﻧﻮ ﻳﺸﻮﻑ ﺑﺪﺭﻳﺔ ﺑﻘﺖ ﻛﻴﻒ .. ﻭﻫﻮ ﻛﻤﻞ ﻗﺮﻳﺐ
ﻟﻠﺴﻨﺔ ﻣﺎﺷﺎﻓﻬﺎ .. ﻭﺑﺘﺨﻴﻞ ﻓﻲ ﺑﺴﻤﺘﻬﺎ ﻭﻓﻲ ﻋﻴﻮﻧﻬﺎ ﻭﺍﺳﺘﻬﺒﺎﻻ . ﻭﺿﺤﻜﺘﻬﺎ
ﺍﻟﺨﺎﻓﺘﺔ .. ﻭﺳﺎﺭﺡ ﻣﻊ ﺍﻟﺨﻴﺎﻝ . ﻭﻣﺎﺟﺎﻳﺐ ﺧﺒﺮ ﻟﻠﻨﺎﺱ ﺍﻟﻤﻌﺎﻫﻮ ﻓﻲ
ﺍﻟﺴﻔﺮﺓ .. ﺍﻟﺠﻴﻠﻲ ﺑﺮﻳﺪ ﺑﺪﺭﻳﺔ ﺭﻳﺪﺓ ﻏﺮﻳﺒﺔ .. ﻭﻣﺎﻣﻌﺮﻭﻑ ﺗﺎﺛﻴﺮ ﺍﻟﺨﺒﺮ ﻳﻜﻮﻥ
ﻋﻠﻴﻬﻮ ﻛﻴﻒ ؟ ..
ﺍﻟﺠﻴﻠﻲ ﻭﺻﻞ ﺍﻟﺨﺮﻃﻮﻡ ﺑﺎﻟﻤﺴﺎﺀ . ﻭﻗﺎﻝ ﻟﻠﺘﺎﻛﺴﻲ ﻳﻮﺩﻳﻬﻮ ﺑﻴﺖ ﺍﻟﻌﺰﺍﺑﺔ ..
ﻭﻫﻨﺎﻙ ﻣﺎﻟﻘﻰ ﺍﻟﻌﺰﺍﺑﻪ . . ﻟﻘﻰ ﺑﻠﻮﻟﺔ ( ﺍﻟﺪﺣﻴﺶ ) .. ﺳﻠﻢ ﻋﻠﻴﻬﻮ ﺑﺸﻮﻕ
ﻋﺠﻴﺐ .. ﻣﺎ ﻋﺎﺭﻓﻮ ﺩﻩ ﺳﺒﺐ ﺍﻟﻤﺼﺎﻳﺐ ﻭﺍﻟﺒﻼﻭﻱ .. ﻗﺎﻝ ﻟﻴﻬﻮ ﻭﻳﻦ
ﺍﻟﺠﻤﺎﻋﺔ .؟
ﻗﺎﻝ ﻟﻴﻬﻮ ﻣﺸﻮ ﺍﻟﺴﻴﻨﻤﺎ .. ﻭﻗﺎﻟﻮ ﺍﻟﻠﻴﻠﺔ ﺑﺎﻳﺘﻴﻦ ﻣﻊ ﺍﻟﺼﺎﺩﻕ ﻓﻲ ﺍﻟﺴﺠﺎﻧﺔ .
ﻗﺎﻝ ﻟﻴﻬﻮ ﻭﺍﻧﺖ ﻣﺎﻟﻚ ﻣﺎﻣﺸﻴﺖ ﻣﻌﺎﻫﻢ ؟.. ﻗﺎﻝ ﻟﻴﻬﻮ ﺍﻧﺎ ﺟﺎﻱ ﻣﻦ
ﺍﻟﻤﺴﺘﺸﻔﻰ .. ﺍﺑﻮﻱ ﻋﻨﺪﻭ ﺣﺒﺲ ﺑﻮﻝ .. ﻭﻗﺎﻟﻮ ﻋﻨﺪﻭ ﺣﺼﻮﺓ ﻓﻲ ﺍﻟﺤﺎﻟﺐ ..
ﻭﺍﻟﻮﺿﻊ ﺻﻌﺐ ﺷﺪﻳﺪ .. ﻭﺍﻟﻠﻪ ﻳﺎ ﺍﻟﺠﻴﻠﻲ ﺍﻧﺎ ﻋﻨﺪﻱ ﻋﺠﻠﺔ ﺟﺪﻳﺪﺓ ﺑﻌﺘﻬﺎ
ﻟﻠﻌﻼﺝ .
ﻭﺑﺮﺿﻮ ﻧﺎﻗﺼﺔ ﻟﻴﻨﺎ ﻗﺮﻭﺵ ﻛﺘﻴﺮﺓ .. ﻭﺣﻖ ﺍﻟﻌﻤﻠﻴﺔ ﻟﺴﻪ ﻣﺎﺩﺑﺮﺗﻮ .. ﻭﻣﺎﻋﺎﺭﻑ
ﺍﺳﻮﻱ ﺷﻨﻮ؟ .. ﺍﺑﻮﻱ ﺗﻌﺒﺎﻥ ﺷﺪﻳﺪ ﻳﻜﻮﺭﻙ ﻣﻦ ﺍﻻﻟﻢ ,,
ﻭﻫﺴﻲ ﺍﻧﺎ ............... ﻭﺳﻜﺖ . ﻗﺎﻝ ﻟﻴﻬﻮ ﻭﺍﻧﺖ ﻣﺎﻟﻚ ﻛﻤﺎﻥ؟ ..
ﺍﻟﺪﺣﻴﺶ ﻗﺎﻝ ﻟﻴﻬﻮ ﻭﺍﻧﺎ ﻇﻬﺮ ﻟﻲ ﺳﻜﺮﻱ .. ﻏﺎﻳﺘﻮ ﻣﺼﺎﻳﺐ ﻭﺭﺍ ﺑﻌﺾ ..
ﺍﻟﺠﻴﻠﻲ ﻗﺎﻝ ﻟﻴﻬﻮ ﺭﺑﻨﺎ ﻳﻠﻄﻒ ﻳﺎﺑﻠﻮﻟﻪ .. ﻗﺮﻭﺵ ﺍﻟﻌﻤﻠﻴﺔ ﻛﻤﻬﺎ؟ .. ﻭﺭﺍﻫﻮ ..
ﻗﺎﻝ ﻟﻴﻬﻮ ﻣﺎﻓﻲ ﻣﺸﻜﻠﺔ .. ﺍﻧﺎ ﺑﺪﻓﻌﻬﺎ ﻟﻴﻚ ﻋﺸﺎﻥ ﺍﻟﻮﺍﻟﺪ ﺗﻌﺒﺎﻥ .. ﻣﺘﻰ
ﻣﺎﺍﻧﺖ ﻟﻘﻴﺘﻬﺎ ﻣﻤﻜﻦ ﺗﺮﺟﻌﻬﺎ ﻓﻲ ﺍﻱ ﻭﻗﺖ .. ﺍﺑﻮﻙ ﺯﻱ ﺍﺑﻮﻱ .. ﻭﻣﺎ ﻣﻤﻜﻦ
ﺍﺧﻠﻴﻬﻮ ﻣﺘﺎﻟﻢ ﻓﻲ ﺣﺎﻟﺔ ﺧﻄﺮﺓ ﺑﺎﻟﻄﺮﻳﻘﺔ ﺩﻱ ﻭﺍﻣﺸﻲ ..
ﻓﻲ ﺍﺛﻨﺎﺀ ﺍﻟﻨﻘﺎﺵ .. ﺍﻟﺪﺣﻴﺶ ﻓﻬﻢ ﺍﻧﻮ ﺍﻟﺠﻴﻠﻲ ﻣﺎﻋﺎﺭﻑ ﺍﻧﻮ ﺑﺪﺭﻳﺔ ﻣﺎﺗﺖ ..
ﻭﻣﺎﻋﺮﻑ ﻳﻜﻠﻤﻮ ﻛﻴﻒ ..
ﻓﻲ ﺍﻟﻨﻬﺎﻳﺔ ﻗﺮﺭ ﺍﻧﻮ ﻳﺴﻜﺖ ﻭﻣﺎﻳﻜﻠﻤﻮ .. ﻗﺎﻝ ﺍﺣﺴﻦ ﻳﺠﻴﻬﻮ ﺍﻟﺨﺒﺮ ﻣﻦ ﺯﻭﻝ
ﺗﺎﻧﻲ .. ﺍﺣﺘﻤﺎﻝ ﻟﻮ ﻋﺮﻑ ﺍﻟﺨﺒﺮ .. ﻳﻐﻴﺮ ﺭﺍﻳﻮ ﻣﺎﻳﺪﻳﻨﻲ ﺍﻟﻘﺮﻭﺵ .. ﻫﺴﻲ
ﻻﻧﻮ ﻓﺮﺣﺎﻥ ﺑﺪﻳﻨﻲ ﻟﻴﻬﺎ .. ﺩﻩ ﺍﻟﺪﺣﻴﺶ ﺑﺘﻜﻠﻢ ﻣﻊ ﺭﻭﺣﻮ .. ﺍﻟﻤﻬﻢ ﺍﻟﺠﻴﻠﻲ
ﺩﺧﻞ
ﺍﺳﺘﺤﻢ ﻭﻃﻠﻊ ﻋﺪ ﺍﻟﻘﺮﻳﺸﺎﺕ ﻟﻲ ﺍﻟﺪﺣﻴﺶ ﺍﺩﺍﻫﺎ ﻟﻴﻬﻮ ..
ﻭﻗﺎﻝ ﻟﻴﻬﻮ ﺍﺻﺒﺮ ﺷﻮﻳﺔ .. ﺍﻧﺎ ﺍﻣﺸﻲ ﻣﻌﺎﻙ ﺍﻟﻤﺴﺘﺸﻔﻰ ﺍﺷﻮﻑ ﺍﻟﻮﺍﻟﺪ ..
ﻗﺎﻝ ﻟﻴﻬﻮ ﻻﻻ ﺍﻧﺖ ﻣﺎﺗﻤﺸﻲ .. ﻻﻧﻮ ﺍﻟﺒﻴﺖ ﻣﺎﻣﻘﻔﻞ ﻛﻮﻳﺲ .. ﻳﺠﻲ ﺣﺮﺍﻣﻲ
ﻳﺴﺮﻕ ﺣﺎﺟﺎﺗﻚ ﺩﻳﻞ .. ﺍﻧﺖ ﺑﻌﺪ ﺍﺩﻳﺘﻨﻲ ﺍﻟﻘﺮﻳﺸﺎﺕ .. ﻭﺍﻟﻠﻪ ﺗﺎﻧﻲ ﻣﺎﻗﺼﺮﺕ
ﺭﺑﻨﺎ ﻳﺒﺎﺭﻙ ﻓﻴﻚ ..
ﺍﻟﺠﻴﻠﻲ ﺑﺎﺕ ﻓﻲ ﺑﻴﺖ ﺍﻟﻌﺰﺍﺑﺔ .. ﻭﺍﻟﺪﻏﺶ ﻗﺎﻡ ﺳﺎﻓﺮ .. ﻭﻟﻐﺎﻳﺔ ﺍﻻﻥ ﻣﺎﻋﻨﺪﻭ
ﺧﺒﺮ ﺑﺎﻟﺤﺎﺻﻞ ﻓﻲ ﺍﻟﺤﻠﻪ ..
ﻭﺻﻞ ﺍﻟﺤﻠﻪ ﻭﺍﻭﻝ ﻣﺎﻧﺰﻝ ﻓﻲ ﺑﻴﺖ ﺍﻫﻠﻮ ..ﻟﻘﻰ ﻭﺍﻣﻮ ﻭﺍﺑﻮﻫﻮ .. ﻣﻮﺟﻮﺩﻳﻦ ..
ﻭﻟﻤﻦ ﺷﺎﻓﻮﻫﻮ ﺍﻧﻔﻘﻌﻮ ﺑﺎﻟﺒﻜﺎ .. ﻭﻫﻮ ﻣﻨﺪﻫﺶ ﻣﻦ ﺑﻜﺎﻫﻢ .. ﻟﻜﻦ ﻗﺎﻝ
ﺍﺣﺘﻤﺎﻝ ﺷﻮﻕ ﺳﺎﻱ ..
ﻭﺳﻼﻡ ﻭﻣﺮﺣﺐ ﻭﺣﻖ ﺍﻟﻠﻪ ﺑﻖ ﺍﻟﻠﻪ .. ﺍﻣﻮ ﻗﺎﻟﺖ ﻟﻴﻬﻮ ﺭﺑﻨﺎ ﻳﻌﻮﺿﻚ ﻳﺎﻭﻟﺪﻱ ..
ﻭﻳﻌﻮﺿﻬﺎ ﺍﻟﺠﻨﺔ ﻓﻲ ﺷﺒﺎﺑﻬﺎ .. ﻗﺎﻝ ﻟﻴﻬﺎ ﻣﻨﻮ ﻳﺎﻳﻤﺔ ﺍﻟﺒﻌﻮﺿﻬﺎ ﺍﻟﺠﻨﺔ ﻓﻲ
ﺷﺒﺎﺑﻬﺎ؟؟
ﺍﻣﻪ ﺳﻜﺘﺖ ﺳﺎﻱ ﻭﻋﺮﻓﺖ ﺍﻧﻮ ﻣﺎﻋﻨﺪﻭ ﺧﺒﺮ ..
ﺍﺑﻮﻫﻮ ﻗﺎﻝ ﻟﻴﻬﻮ .. ﺍﻟﺠﻴﻠﻲ ﻳﺎﻭﻟﺪﻱ ﺍﻧﺖ ﻫﺴﻲ ﺟﺎﻱ ﻣﻦ ﺍﻟﺴﻔﺮ .. ﺍﺧﺪ
ﺭﺍﺣﺘﻚ ﺑﻌﺪﻳﻦ ﻧﺤﻜﻲ ﻟﻴﻚ ..
ﻗﺎﻝ ﻟﻴﻬﻮ ﻳﺎﺍﺑﻮﻱ ﻓﻲ ﺷﻨﻮ؟؟ ﺍﻧﺎ ﺣﺎﺳﻲ ﺍﻧﻜﻢ ﺩﺍﺳﻴﻦ ﻋﻠﻲ ﺣﺎﺟﺔ .. ﺻﻔﻴﺔ
ﺍﺧﺘﻲ ﻭﻳﻨﻬﺎ ؟ ﻫﻲ ﻛﻮﻳﺴﻪ؟؟ .. ﺻﻔﻴﺔ ﺟﺎﺕ ﻣﻦ ﺟﻮﺓ ﺗﻨﻔﺾ ﻓﻲ ﻳﺪﻳﻨﻬﺎ ﻣﻦ
ﺍﻟﺼﺎﺑﻮﻥ .. ﻛﺎﻧﺖ ﺑﺘﻐﺴﻞ ..
ﻟﻤﻦ ﺍﻟﺠﻴﻠﻲ ﺷﺎﻓﻬﺎ ﺍﻃﻤﺄﻥ ﺷﻮﻳﺔ ..
ﻭﺳﻠﻢ ﻋﻠﻴﻬﺎ ﺑﻜﻞ ﻓﺮﺣﺔ .. ﻭﻗﻌﺪﻭ ﺍﻟﺘﻼﺗﺔ ﻣﺎﻋﺎﺭﻓﻴﻦ ﻳﺤﻜﻮ ﻟﻴﻬﻮ ﻛﻴﻒ ؟
ﺑﻌﺪ ﺷﻮﻳﺔ ﺟﺎ ﺣﺎﻣﺪ ﻣﻦ ﺑﺮﺓ .. ﻭﺭﻓﻊ ﻣﻊ ﺍﻟﺠﻴﻠﻲ ﺍﻟﻔﺎﺗﺤﺔ . ﻗﺎﻳﻠﻮ ﻋﺎﺭﻑ ..
ﺍﻟﺠﻴﻠﻲ ﺭﻓﻊ ﺍﻟﻔﺎﺗﺤﺔ ﻭﻣﻄﻴﺮ ﻋﻴﻨﻴﻬﻮ .. ﻭﻣﺎﻓﺎﻫﻢ ﺍﻱ ﺣﺎﺟﺔ ..
ﺑﻌﺪ ﺳﻠﻢ ﻋﻠﻲ ﺣﺎﻣﺪ ﺑﻜﻞ ﺷﻮﻕ ﻭﺍﺑﺘﺴﺎﻣﺔ . ﻗﺎﻝ ﻟﻴﻬﻮ ﻳﺎﺣﺎﻣﺪ ﺍﺧﻮﻱ .. ﺍﻧﺖ
ﺭﻓﻌﺖ ﻣﻌﺎﻱ ﺍﻟﻔﺎﺗﺤﺔ ﻓﻲ ﻣﻨﻮ؟ .. ﺣﺎﻣﺪ ﻗﻌﺪ ﻳﻌﺎﻳﻦ ﻻﺑﻮﻫﻮ ﻭﺍﻣﻪ ..
ﻗﺎﻝ ﻟﻴﻬﻢ ﻳﻌﻨﻲ ﻣﻮﻋﺎﺭﻑ؟
ﻗﺎﻟﻮ ﻟﻴﻬﻮ ﻻ ﺍﻟﺠﻴﻠﻲ ﻛﻮﺭﻙ ﻓﻲ ﺣﺎﻣﺪ ( ﻳﺎﺣﺎﺍﺍﺍﺍﺍﺍﺍﺍﺍﻣﺪ ﻓﻲ ﺷﻨﻮ؟ )
ﺣﺎﻣﺪ ﻗﺎﻝ ﻟﻴﻬﻮ : ((ﺑﺪﺭﻳﺔ ﺑﺖ ﺣﺎﺝ ﺍﺣﻤﺪ ﻏﺮﻗﺖ ﻳﺎ ﺍﻟﺠﻴﻠﻲ ..))
ﻗﺎﻝ ﻟﻴﻬﻮ ﻏﺮﻗﺖ ﻛﻴﻒ ﻳﻌﻨﻲ؟؟ .. ﻗﻮﻝ ﻛﻼﻡ ﻏﻴﺮ ﺩﻩ .. ﺍﻧﺘﻮ ﺩﺍﻳﺮﻳﻦ ﺗﺴﻮﻭ
ﻓﻴﻨﻲ ﻣﻘﻠﺐ ﻭﻣﺘﻔﻘﻴﻦ ﻋﻠﻴﻬﻮ ﻭﻗﻌﺪ ﻳﻀﺤﻚ ﻭﻫﻢ ﻳﻌﺎﻳﻨﻮ ﻟﻴﻬﻮ..
ﺣﺎﻣﺪ ﻗﺎﻝ ﻟﻴﻬﻮ .. ﺍﻧﺖ ﺑﻌﺪ ﻣﺎﺳﺎﻓﺮﺗﺎ ﺟﻮ ﻧﺎﺱ ﻳﺨﻄﺒﻮ ﺑﺪﺭﻳﺔ ﻭﺍﻟﺰﻋﻴﻢ ﻗﺎﻝ
ﻟﻴﻬﻢ ﻛﻴﺖ ﻛﻴﺖ ﻧﺤﻦ ﻭﺑﻌﺪ ﺍﻧﺖ ﺳﺎﻓﺮﺗﺎ ﺑﻲ ﻓﺘﺮﺓ ﺟﺎﻧﺎ ﺟﻮﺍﺏ ﻣﻦ ﻧﺎﺻﺮ ﺍﻧﻚ
ﻛﺪﺍ ﻛﺪﺍ .. ﻗﺎﻝ ﻟﻴﻬﻮ ﻋﺎﺭﻑ ﺩﻩ ﻛﻠﻮ .. ﻗﺎﻝ ﻟﻴﻬﻮ ﺍﻟﺰﻋﻴﻢ ﻗﺎﻝ ﻗﺎﻝ ﻭﺍﻟﺠﻤﺎﻋﺔ
ﺟﻮ ﻳﻌﺮﺳﻮ ﺑﺪﺭﻳﺔ .. ﻭﻳﻮﻡ ﻋﺮﺳﻬﺎ ﻭﻗﻌﺖ ﺍﻟﺒﺤﺮ .. ﻭ ﻣﺎ ﺍﺗﻠﻘﺖ ﺗﺎﻧﻲ
ﺍﻟﻤﻬﻢ .. ﻟﻴﻬﻮ ﻛﻞ ﺗﻔﺎﺻﻴﻞ ﺍﻟﺤﺼﻞ ,,
ﻭﺍﻧﻮ ﺑﺪﺭﻳﺔ ﻏﺮﻗﺖ ﻓﻲ ﺍﻟﺒﺤﺮ .. ﻭﻓﺘﺸﻨﺎ ﻟﻴﻬﺎ ﻭﻣﺎﻟﻘﻴﻨﺎﻫﺎ .. ﻭﻓﻲ ﺍﻟﻨﻬﺎﻳﺔ
ﻗﻠﻌﺖ ﻓﻲ ﺍﻟﺸﻤﺎﻟﻴﺔ ﻭﺩﻓﻨﻮﻫﺎ ﻫﻨﺎﻙ ..
ﻗﺎﻝ ﻟﻴﻬﻮ ﺍﻭﻻ ﻗﺼﺘﻚ ﺩﻱ ﻣﺎﻗﺎﺩﺭ ﺍﺳﺘﻮﻋﺒﺎ .. ﻭﻣﺎﺭﻛﺒﺖ ﻓﻴﺮﺍﺳﻲ ﻧﻬﺎﺋﻲ ..
ﺍﺭﺡ ﻣﻌﺎﻱ ﻋﻠﻰ ﺣﺎﺝ ﺍﺣﻤﺪ .. ﻭﻫﻢ ﻓﻲ ﺍﻟﺸﺎﺭﻉ ﺍﻱ ﺯﻭﻝ ﻳﻼﻗﻴﻬﻢ .. ﻳﺪﻭﺭ
ﻳﺮﻓﻊ ﺍﻟﻔﺎﺗﺤﺔ ﻣﻊ ﺍﻟﺠﻴﻠﻲ .. ﺍﻟﺠﻴﻠﻲ ﻳﺮﻓﺾ .. ﻳﻘﻮﻝ ﻟﻬﻢ ﺍﻧﺎ ﻣﺎﺑﺮﻓﻊ ﻓﺎﺗﺤﺔ
ﻓﻲ ﺯﻭﻝ ﻣﺎﻋﺎﺭﻓﻮ ﺣﻲ ﻭﻻﻣﺎﺕ . ﺍﻻ ﺍﺗﺎﻛﺪ ﺍﻧﻮ ﻣﺎﺕ ﻓﻌﻼ ".
ﺧﻼﺹ ﺍﻟﻨﺎﺱ ﺣﺴﻮ ﺍﻧﻮ ﺟﻨﺎ ﻭﻋﻘﻠﻮ ﺑﻘﻰ ﻣﺎ ﻣﻈﺒﻮﻁ ..
ﻭﺻﻠﻮ ﻟﻲ ﺩﻳﻮﺍﻥ ﺣﺎﺝ ﺍﺣﻤﺪ .. ﺍﻟﺰﻋﻴﻢ ﺍﻭﻝ ﺣﺎﺝ ﻣﺎﺷﺎﻑ ﺍﻟﺠﻴﻠﻲ ﺧﻨﻘﺘﻮ
ﺍﻟﻌﺒﺮﺓ .. ﻭﺩﻣﻮﻋﻮ ﺍﺷﺘﺘﻦ ..
ﺍﻟﺠﻴﻠﻲ ﻗﺎﻝ ﻟﻴﻬﻮ .. ﺍﻟﺴﻼﻡ ﻋﻠﻴﻬﻢ ﻳﺎﻋﻤﻲ ﻭﻳﺎﺯﻋﻴﻢ ﺍﻟﺒﻠﺪ .. ﺍﻧﺎ ﻣﺎﺑﺮﻓﻊ
ﺍﻟﻔﺎﺗﺤﺔ ﻓﻲ ﺑﺪﺭﻳﺔ ﻻﻧﻲ ﻣﺎﻣﺘﺄﻛﺪ ﺍﻧﻬﺎ ﻣﺎﺗﺖ .. ﻻﺯﻡ ﺗﻘﻨﻌﻮﻧﻲ ..
ﺣﺎﺝ ﺍﺣﻤﺪ ﻗﺎﻝ ﻟﻴﻬﻮ ﻳﺎﻭﻟﺪﻱ ﺍﻟﻤﻮﺕ ﺣﻖ .. ﺍﺻﺒﺮ ﻭﺍﻟﺼﺒﺮ ﺟﺒﺮ ..
ﺍﻟﺠﻴﻠﻲ ﻗﺎﻝ ﻟﻴﻬﻮ ﺍﻧﺘﻮ ﻟﻘﻴﺘﻮ ﺑﺪﺭﻳﺔ ؟ ﻃﻠﻌﺘﻮﻫﺎ ﻣﻦ ﺍﻟﺒﺤﺮ ﺍﺗﺎﻛﺪﺗﻮ ؟
ﻗﺎﻝ ﻟﻴﻬﻮ ﻳﺎﻭﻟﺪﻱ ﻛﻞ ﺣﺎﺟﺔ ﺑﺘﺪﻝ ﻋﻠﻰ ﺍﻟﻤﻮﺕ .. ﺳﻔﻨﺠﺘﻬﺎ ﻓﻮﻕ ﺍﻟﻘﻴﻒ ..
ﻭﻃﺮﺣﺘﻬﺎ ﻃﻠﻌﻨﺎﻫﺎ ﻣﻦ ﺍﻟﻤﻮﻳﺔ .. ﻭﺍﺛﺮ ﻛﺮﻋﻴﻬﺎ ﺩﺧﻞ ﻋﻠﻰ ﺍﻟﺒﺤﺮ .. ﻭﺍﻫﻠﻚ
ﻓﻲ ﺍﻟﺸﻤﺎﻟﻴﺔ ﻓﻲ ﺍﻟﻤﻨﻄﻘﺔ ﺍﻟﻔﻼﻧﻴﺔ .. ( ﺍﻟﻤﻨﻄﻘﺔ ﺍﺳﻤﻬﺎ ﻛﺠﻲ ﻓﻲ ﺍﻟﺠﺰﻳﺮﺓ
ﻣﻘﺮﺍﺕ ﻣﻨﻄﻘﺔ ﻓﻲ ﺍﻟﺮﺑﺎﻃﺎﺏ ) . ﻗﺎﻟﻮ ﻃﻠﻌﻮ ﺟﺜﺔ ﺑﺖ ﻣﺤﻨﻨﺔ ﻭﺩﻓﻨﻮﻫﺎ .. ..
ﺍﻟﺠﻴﻠﻲ ﻗﺎﻝ ﻟﻴﻬﻮ ﺑﺮﺿﻮ ﺍﻧﺎ ﻣﺎﻣﻘﺘﻨﻊ .. ﻟﻤﻦ ﺍﺗﺎﻛﺪ ﺍﻧﻮ ﺑﺪﺭﻳﺔ ﻣﺎﺗﺖ .. ﺑﺠﻲ
ﺑﺮﻓﻊ ﻣﻌﺎﻙ ﺍﻟﻔﺎﺗﺤﺔ .. ﻭﺍﻗﺴﻢ ﺑﺠﻼﻝ ﺍﻟﻠﻪ ﺑﺪﺭﻳﺔ ﺗﻜﻮﻥ ﻣﺎﺗﺖ .. ﺍﻧﺎ ﺗﺎﻧﻲ ﻓﻲ
ﺣﻴﺎﺗﻲ ﻣﺎ ﺍﻣﺴﻚ ﻣﺮﺓ ﺑﻴﺪﻱ .. ﻻﻣﻦ ﺍﻻﻗﻰ ﺍﻟﻠﻪ
الرجوع الى أعلى الصفحة اذهب الى الأسفل
http://loaaqlb.wwooww.net
 
ضيــــــــــــــــــــــــــاع الدر ح20
الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
لُـ‘ـُــــــــــــــۅعُـ‘ـُة قُـ‘ـُلُـ‘ـُـــــــــبُـ‘ـُ :: منتدى المنوعـــــــــات-
انتقل الى: