ضيــــــــــــــــــــــــــاع الدرح13

ﺿﻴﺎﻉ ﺍﻟﺪﺭ
ﺍﻟﺤﻠﻘﻪ 13
ﺍﻟﺠﻴﻠﻲ ﺑﻌﺪ ﻧﺎﺩﺍﻫﻮ ﺍﻟﺴﺠﺎﻥ ..ﻃﻠﻊ ﻳﺸﻮﻑ ﺍﻟﺰﻭﻝ ﺍﻟﺠﺎﻫﻮ ﺯﻳﺎﺭﺓ ﻓﻲ ﺍﻟﺴﺠﻦ
ﺩﻩ ﻣﻨﻮ .. ﻟﻘﺎﻫﻮ .. ﺩﻩ ﻧﺎﺻﺮ ﺍﻟﻔﻲ ﺍﻟﻄﺎﺋﻒ ﺍﺧﻮ ﺻﺎﺣﺒﻮ ﺍﻟﻔﻲ ﺍﻟﺨﺮﻃﻮﻡ .
ﺻﺎﺣﺐ ﺍﻟﻜﻔﻴﻞ ﺍﻟﻜﺎﻥ ﺍﺳﺘﻘﺒﻠﻪ ﻓﻲ ﺍﻭﻝ ﻳﻮﻡ ﺟﺎﺀ . ﺍﻟﻈﺎﻫﺮ ﺇﻧﻮ ﻣﺸﻰ ﺍﻟﻤﺼﻨﻊ
ﻋﺸﺎﻥ ﻳﻘﺎﺑﻠﻮ . ﻭﻳﻄﻤﺌﻦ ﻋﻠﻴﻬﻮ ﺷﻐﺎﻝ ﻛﻴﻒ . ﺑﺲ ﺻﺎﺣﺒﻮ ﺍﻟﻜﻔﻴﻞ ﻛﻠﻤﻪ ﺍﻧﻮ
ﺍﻟﺠﻴﻠﻲ ﺍﻧﺴﺠﻦ . ﻭﺣﻜﺎ ﻟﻴﻬﻮ ﺍﻟﻘﺼﻪ ﻛﻠﻬﺎ .. ﺍﻫﺎ ﺍﻟﺰﻭﻝ ﺩﻩ ﺟﺎ ﺯﻳﺎﺭﺓ ﻟﻠﺠﻴﻠﻲ
ﻓﻲ ﺍﻟﺴﺠﻦ ..
ﻗﺎﻝ ﻟﻴﻬﻮ ﺩﻩ ﺷﻨﻮ ﻳﺎﺯﻭﻝ ﺍﻟﻌﻤﻠﺘﻪ ﻓﻲ ﺭﻭﺣﻚ ﺩﻩ .. ؟
ﺍﻟﺠﻴﻠﻲ ﻗﺎﻝ ﻟﻴﻬﻮ .. ﺩﻩ ﻗﺪﺭ ﺭﺏ ﺍﻟﻌﺎﻟﻤﻴﻦ ﻭﺍﻱ ﺯﻭﻝ ﺑﻴﺎﻛﻞ ﻗﺴﻤﺘﻮ ..
ﻗﺎﻝ ﻟﻴﻬﻮ ﺍﻧﺖ ﻧﺎﺳﻲ ﻋﻨﺪﻙ ﺯﻣﻦ ﻻﺯﻡ ﺗﻨﻔﺬ ﻓﻴﻬﻮ ﻭﻋﻮﺩﻙ .. ؟
ﻗﺎﻝ ﻟﻴﻬﻮ ﻋﺎﺭﻑ ﻳﺎ ﻧﺎﺻﺮ ﺍﻧﺎ ﺣﺎﻓﻆ ﺣﺪﻳﺚ ﻭﺍﺣﺪ ﺍﺑﻮﻱ ﻛﺎﻥ ﺑﻘﻮﻟﻮ ﻛﺘﻴﺮ .
ﻛﺎﻥ ﺍﻟﻠﻪ ﻓﻲ ﻋﻮﻥ ﺍﻟﻌﺒﺪ ﻣﺎ ﻛﺎﻥ ﺍﻟﻌﺒﺪ ﻓﻲ ﻋﻮﻥ ﺍﺧﻴﻪ . ﺍﻧﺎ ﻣﺘﺎﻛﺪ ﺩﺍﻣﻨﻲ
ﺑﺴﺎﻋﺪ ﺭﺑﻨﺎ ﺑﺴﺎﻋﺪﻧﻲ ﻭﻣﺎ ﺑﻀﻴﻊ ﺣﻘﻲ ﺍﺑﺪﺍ ﻭﺑﺮﺍﻙ ﺑﺘﺸﻮﻑ ..
ﻭﺃﻧﺎ ﻣﺎﻧﺪﻣﺎﻥ ﻋﻠﻰ ﺗﺼﺮﻑ ﺍﺗﺼﺮﻓﺘﻪ .. ﺍﻧﺖ ﻛﻴﻒ ﻭﺍﺣﻮﺍﻟﻚ ﻭﺟﻤﺎﻋﺘﻚ ﻭﻧﺎﺱ
ﺍﻟﺴﻮﺩﺍﻥ .
ﻗﺎﻝ ﻟﻴﻬﻮ ﻭﺍﻟﻠﻪ ﺍﻟﺠﻤﺎﻋﺔ ﻣﺮﺍﺳﻼﺗﻬﻢ ﻛﻠﻬﺎ ﺑﺴﺄﻟﻮ ﻣﻨﻚ .. ﻭﺑﺴﻠﻤﻮ ﻋﻠﻴﻚ ..
ﻗﺎﻝ ﻟﻴﻬﻮ ﻭﺍﻟﻠﻪ ﺻﺎﺣﺒﻚ ( ﻣﺴﻌﺪ ) ﺍﺻﻠﻮ ﻣﻮ ﻣﻘﺼﺮ ﻣﻌﺎﻱ .. ﻣﺴﻌﺪ ﺩﻩ
ﻛﻔﻴﻞ
ﺍﻟﺠﻴﻠﻲ ..
ﻭﺑﺠﻴﻨﻲ ﻃﻮﺍﻟﻲ ﻭﻣﺼﺎﺭﻳﻔﻲ ﻣﺎﺷﺔ ﻭﺯﻳﺎﺭﺍﺗﻮ ﻣﺎ ﺍﻧﻘﻄﻌﺖ ..
ﻗﺎﻝ ﻟﻴﻬﻮ ﻳﺎﺥ ﺩﺍ ﺭﺍﺟﻞ ﺍﺻﻴﻞ ..
ﺍﻟﺠﻴﻠﻲ ﻗﺎﻝ ﻟﻴﻬﻮ ﻋﻠﻴﻚ ﺍﻟﻠﻪ ﻗﻮﻟﻮ ﺍﻟﺠﻴﻠﻲ ﺩﺍﻳﺮﻙ ﺿﺮﻭﺭﻱ ..
ﻋﻨﺪﻱ ﻣﻮﺿﻮﻉ ﻫﺎﻣﻨﻲ ﻫﻢ ﺷﺪﻳﺪ ﺧﻼﺹ ..
ﻋﻨﺪﻱ ﺻﺎﺣﺒﻲ ﻭﺍﺧﻮﻱ ﺷﺪﻳﺪ . ﻣﺴﺠﻮﻥ ﻫﻨﺎ ﻓﻲ ﺍﻟﺴﺠﻦ ﺑﺎﻟﻈﻠﻢ ﻭﺍﻟﻌﺪﻭﺍﻥ ..
ﺍﻣﻜﻦ ﻳﻘﺪﺭ ﻳﺴﺎﻋﺪ ..
ﻗﺎﻝ ﻟﻴﻬﻮ ﺟﺪﺍ ﺑﺲ ﺍﻟﺠﻴﻠﻲ ﻧﺴﻰ ﺣﺎﺟﺔ. ﻛﺎﻥ ﺍﻟﻤﻔﺮﻭﺽ ﻳﻮﺻﻲ ﻧﺎﺻﺮ ﻳﻘﻮﻝ
ﻟﻴﻬﻮ ﻣﺎﺗﺘﻜﻠﻢ ﺗﻘﻮﻝ ﻟﻲ ﺯﻭﻝ ﺍﻧﻮ ﺍﻟﺠﻴﻠﻲ ﻓﻲ ﺍﻟﺴﺠﻦ ..
ﻻﻧﻮ ﺍﻟﺨﺒﺮ ﻟﻮ ﻭﺻﻞ ﺍﻟﺴﻮﺩﺍﻥ .. ﺑﺼﻞ ﻣﻘﻠﺒﻦ ﻭﻣﺘﻐﻴﺮ ..ﻭﻣﺎﺑﺼﻞ ﺑﺤﻘﻴﻘﺘﻮ
ﻭﺗﻔﺎﺻﻴﻠﻮ ..
ﻭﻣﺎﻛﻠﻢ ﻧﺎﺻﺮ ﻟﻴﻪ ؟.. ﻳﺎ ﺍﻣﺎ ﻭﺍﺛﻖ ﻓﻲ ﻧﺎﺻﺮ ﻣﺎﺑﺘﻜﻠﻢ .
ﻳﺎ ﺇﻣﺎ ﻧﺴﻰ ﻓﻲ ﻏﻤﺮﺓ ﺍﻫﺘﻤﺎﻣﻮ ﺑﻤﻮﺿﻮﻉ ﺻﺤﺒﻮ ﺍﻟﻤﻈﻠﻮﻡ ﻓﻲ ﺍﻟﺴﺠﻦ .
ﺍﻟﻤﻬﻢ .. ﻧﺎﺻﺮ ﻣﺸﻰ ﻛﻠﻢ ﻣﺴﻌﺪ ﺍﻟﻜﻔﻴﻞ ﻭﻗﺎﻝ ﻟﻴﻬﻮ ﺍﻟﺠﻴﻠﻲ ﻣﺤﺘﺎﺝ ﻟﻴﻚ ﻓﻲ
ﺍﻟﺴﺠﻦ ..
ﻭﻓﻌﻼ .. ﻣﺴﻌﺪ ﻣﺸﻰ ﻟﻴﻬﻮ .. ﻭﺍﻟﺠﻴﻠﻲ ﺣﻜﺎ ﻟﻴﻬﻮ ﻗﺼﺔ ﺣﺴﻦ ﺍﻟﻤﺼﺮﻱ
ﻭﻇﻠﻤﻮ .. ﻭﻗﺎﻝ ﻟﻴﻬﻮ ﻋﺎﻳﺰﻙ ﺗﻤﺸﻲ ﻟﻲ ﻛﻔﻴﻠﻮ . ﻭﺗﻮﺻﻴﻬﻮ ﺍﻧﻮ ﻳﺘﺤﻘﻖ ﻣﻦ
ﺑﺘﻮ ..ﻭﻋﻼﻗﺘﻬﺎ ﺑﺎﻟﻤﻜﻮﺟﻲ ..
ﺑﻄﺮﻳﻘﺔ ﺳﺮﻳﺔ ﻋﺸﺎﻥ ﺗﺘﺒﻴﻦ ﻟﻴﻬﻮ ﺍﻟﺤﻘﺎﻳﻖ . ﻭﻳﺘﺒﺮﺃ ﺍﻟﺒﺮﺉ ..
ﻣﺴﻌﺪ ﺍﻟﻜﻔﻴﻞ ﺑﻘﻰ ﻳﻌﺎﻳﻦ ﻟﻠﺠﻴﻠﻲ ﻓﻲ ﻭﺷﻮ ..ﻣﺴﺘﻐﺮﺏ ﻣﻦ ﺃﺻﺎﻟﺔ ﺍﻟﺰﻭﻝ
ﺍﻟﺴﻮﺩﺍﻧﻲ ﺩﻩ ..
ﺍﻟﻤﻬﺘﻢ ﺑﺎﻻﺧﺮﻳﻦ ﻭﻧﺎﺳﻲ ﻧﻔﺴﻮ ..
ﻗﺎﻝ ﻟﻴﻬﻮ ﻳﺎ ﺍﻟﺠﻴﻠﻲ ﻣﺎﺗﺸﻴﻞ ﻫﻢ ﺍﻧﺎ ﺍﻧﺸﺎﺀ ﺍﻟﻠﻪ ﺍﻫﺘﻢ ﺑﺎﻟﻤﻮﺿﻮﻉ ..
ﻭﺑﺎﻻﺧﺘﺼﺎﺭ ﻣﺴﻌﺪ ﺳﻌﻰ ﻣﺴﺎﻋﻲ ﺣﺜﻴﺜﺔ . ﻭﻓﻌﻼ " ﺗﺒﻴﻨﺖ ﺍﻟﺤﻘﺎﻳﻖ .. ﻭﻛﻔﻴﻞ
ﺣﺴﻦ ﺍﻟﻤﺼﺮﻱ ﺍﻋﺎﺩ ﻓﺘﺢ ﺍﻟﻘﻀﻴﺔ ﻣﻦ ﺟﺪﻳﺪ .. ﻭﺣﺴﻦ ﺍﺗﺒﺮﺃ ﻭﺍﻟﻤﻜﻮﺟﻲ ﺍﺗﺤﺸﺮ
ﻓﻲ ﻣﻜﺎﻧﻮ ﺍﻟﻄﺒﻴﻌﻲ..
ﻭﺣﺴﻦ ﻃﻠﻊ ﺑﺮﺉ ﻣﻦ ﺍﻟﺴﺠﻦ ..
ﻭﺍﻟﻤﺴﺎﺟﻴﻦ ﻋﻤﻠﻮ ﻟﻴﻬﻮ ﺣﻔﻠﺔ ﻭﺩﺍﻉ ﻟﺤﺴﻦ .. ﺣﺘﻲ ﻧﺎﺱ ﺷﺮﻃﺔ ﺍﻟﺴﺠﻦ
ﺍﺣﺘﻔﻠﻮ ﻣﻌﺎﻫﻢ ﻭﻛﺎﻥ ﻳﻮﻡ ﻣﺸﻬﻮﺩ .. ﺃﻫﺎ ﻟﻤﻦ ﺣﺴﻦ ﺟﺎ ﻃﺎﻟﻊ .. ﺍﻟﺠﻴﻠﻲ ﻗﺎﻝ
ﻟﻴﻬﻮ ﺍﻧﺎ ﺑﻤﺠﺮﺩ ﻣﺎ ﺃﻃﻠﻊ ﺣﺄﺟﻲ ﻋﻠﻴﻚ .. ﻭﺍﻟﺤﻤﺪ ﻟﻠﻪ ﺣﺴﻦ ﺭﺟﻊ ﻟﻲ ﺷﻐﻠﻪ
ﻭﺩﻓﻌﻮﺍ ﻟﻴﻬﻮ ﺗﻌﻮﻳﺾ ﻛﺒﻴﺮ ..
ﻭﺍﻟﺠﻴﻠﻲ ﻓﺮﺣﺎﻥ ﻓﺮﺡ ﻛﺄﻧﻮ ﻫﻮ ﺍﻟﻤﺮﻕ ﻣﻦ ﺍﻟﺴﺠﻦ ..
ﺑﺎﻟﻤﻨﺎﺳﺔ ﻓﻲ ﻧﺎﺱ ﻋﻨﺪﻫﻢ ﻃﺒﻴﻌﺔ .. ﺑﺴﺘﻤﺘﻌﻮﺍ ﺑﺎﻻﺣﺴﺎﻥ ﻭﻣﺴﺎﻋﺪﺓ
ﺍﻻﺧﺮﻳﻦ .. ﻭﺑﺨﺮﻣﻮ ﻟﻴﻬﺎ ﻋﺪﻳﻞ ..
ﺯﻱ ﺍﻟﺠﻴﻠﻲ ﺩﻩ ﻟﻤﻦ ﻳﺤﻞ ﻟﻴﻬﻮ ﻣﺸﻜﻠﺔ ﺯﻭﻝ ﺑﻜﻮﻥ ﻓﺮﺣﺎﻥ ﺷﻬﺮ ﻭﺍﻛﺘﺮ .
ﻣﺮﺕ ﺍﻻﻳﺎﻡ ........
ﻭﻛﺎﻥ ﻣﺴﻌﺪ ﻋﻨﺪﻭ ﻣﺴﺎﻋﻲ ﻣﻊ ﺍﻟﺤﻜﻮﻣﺔ ﻭﺍﻟﺠﻬﺎﺕ ﺍﻟﺮﺳﻤﻴﺔ ﻓﻲ ﻃﻠﺐ
ﺍﺳﺘﺮﺣﺎﻡ ﻟﻠﺠﻴﻠﻲ .. ﻭﺗﺨﻔﻴﻒ ﺍﻟﻌﻘﻮﺑﺔ ..
ﻭﺍﻟﻨﺎﺱ ﻗﺎﻟﻮ ﻟﻴﻬﻮ .. ﻟﻮ ﺍﺧﺘﺼﺮﺕ ﺍﻟﻤﻮﺿﻮﻉ ﻭﺟﺒﺖ ﺗﻮﺻﻴﺔ ﻣﻦ ﻭﺯﺍﺭﺓ
ﺍﻟﻌﺪﻝ ..
ﻻﻥ ﻗﻀﻴﺔ ﺣﺴﻦ ﺗﺨﺺ ﺍﻟﺪﻭﻟﺔ ﻭﻣﺎﻣﺘﻌﻠﻘﺔ ﺑﻈﻠﻢ ﺍﺣﺪ ..
ﻭﻓﻲ ﻣﺴﺎﻋﻴﻪ ﻛﺘﺐ ﺗﻮﺻﻴﺔ ﺍﺳﺘﺮﺣﺎﻡ ﻭﺣﻜﻰ ﻓﻴﻬﺎ ﻛﻞ ﻗﺼﺔ ﺍﻟﺠﻴﻠﻲ ..
ﻭﻭﺯﺍﺭﺓ ﺍﻟﻌﺪﻝ ﻭﻋﺪﺕ ﺑﺎﻟﻨﻈﺮ ﻓﻲ ﺍﻟﻘﻀﻴﺔ .. ﻭﺷﺮﻃﺔ ﺍﻟﺴﺠﻮﻥ ﺳﺎﻋﺪﺕ ﺑﺮﻓﻊ
ﺗﻘﺮﻳﺮ ﻋﻦ ﺣﺴﻦ ﺍﻟﺴﻴﺮ ﻭﺍﻟﺴﻠﻮﻙ .. ﺗﻠﺒﻴﺔ ﻟﻄﻠﺐ ﻣﺴﻌﺪ ..
ﻭﺍﻟﺒﺸﺎﺭﺍﺕ ﻃﻴﺐ ﺍﻧﻮ ﺍﻟﺠﻴﻠﻲ ﺟﺎﻳﻴﻬﻮ ﺍﻟﻔﺮﺝ ..
ﻓﻲ ﻳﻮﻡ ﺟﺎ ﻣﺴﺆﻝ ﻓﻲ ﺯﻳﺎﺭﺓ ﻟﻠﺴﺠﻦ . ﻭﻻﺣﻆ ﺗﺪﻧﻲ ﻣﺴﺘﻮﻯ ﺍﻟﻔﻮﺿﻰ ﻓﻲ
ﺍﻟﺴﺠﻦ ﺑﻨﺴﺒﺔ ﻛﺒﻴﺮﻩ ..ﻣﻊ ﺍﻟﻌﻠﻢ ﻫﺬﻩ ﺍﻟﻔﻮﺿﻰ ﺍﻣﺮ ﻃﺒﻴﻌﻲ ﻓﻲ ﻛﻞ ﺳﺠﻮﻥ
ﺍﻟﻌﺎﻟﻢ ﻭﻫﻲ ﻣﻦ ﺍﻟﺼﻔﺎﺕ ﺍﻟﻤﻌﻬﻮﺩﺓ ﻓﻲ ﺍﻟﺴﺠﻮﻥ ..
ﻓﺎﻟﻤﺴﺆﻝ ﻋﺮﻑ ﺳﺒﺐ ﻫﺬﺍ ﺍﻟﻬﺪﻭﺀ .. ﻓﻌﻤﻞ ﺍﺟﺘﻤﺎﻉ ﻣﻊ ﺍﻟﻤﺴﺎﺟﻴﻦ . ﻭﻭﺻﺎﻫﻢ
ﺑﺎﻻﺳﺘﻤﺮﺍﺭﻳﺔ ﻓﻲ ﺍﻻﺻﻼﺡ ﺑﻌﺪ ﺧﺮﻭﺝ ﺍﻟﺠﻴﻠﻲ ..
ﻭﻣﻦ ﻫﻨﺎ ﺍﻟﺠﻴﻠﻲ ﻭﻧﺎﺱ ﺍﻟﺴﺠﻦ ﻋﺮﻓﻮ ﺍﻧﻮ ﻗﺮﺑﺖ ﻣﻮﺍﻋﻴﺪ .. ﻃﻠﻮﻉ ﺍﻟﺠﻴﻠﻲ ﻣﻦ
ﺍﻟﺴﺠﻦ ..
ﻭﺩﻩ ﻛﻠﻮ ﻛﺎﻥ ﺑﻤﺴﺎﻋﻲ ﻣﻦ ﺍﻟﻜﻔﻴﻞ ﻣﺴﻌﺪ .. ﻭﺍﻟﺠﻴﻠﻲ ﻣﺎﻋﻨﺪﻭ ﺧﺒﺮ ﻭﻻ ﻛﺎﻥ
ﻋﻨﺪﻭ ﺍﻣﻞ ..
ﻓﻲ ﻃﻠﻮﻉ ﻗﺒﻞ ﺍﻟﻔﺘﺮﺓ ﺍﻟﻤﺤﻜﻮﻡ ﺑﻴﻬﺎ .. ﻭﺭﺑﻨﺎ ﻛﺮﻳﻢ ..
ﺍﻫﺎ ﺑﺎﻟﻨﺴﺒﺔ ﻟﻨﺎﺻﺮ ﻛﺘﺐ ﺟﻮﺍﺏ ﻻﺧﻮﺍﻧﻪ ﻓﻲ ﺍﻟﺴﻮﺩﺍﻥ ﻭﻓﻲ ﺍﺛﻨﺎﺀ ﺍﻟﺨﻄﺎﺏ
ﻛﺘﺐ ﻟﻴﻬﻢ ﺟﻤﻠﺔ ﻣﺨﺘﺼﺮﺓ ..
( ﺃﺧﻮﻧﺎ ﺍﻟﺠﻴﻠﻲ ﻣﺴﺠﻮﻥ ﻓﻲ ﻗﻀﻴﺔ ﻣﺨﺪﺭﺍﺕ ﺩﻋﻮﺍﺗﻜﻢ ﻟﻴﻬﻮ .. )
ﻃﺒﻌﺎ ﻧﺎﺻﺮ ﻛﺘﺐ ﺍﻟﻌﺒﺎﺭﺓ ﺑﺤﺴﻦ ﻧﻴﺔ.. ﻭﻣﺎﻋﻨﺪﻭ ﺍﻱ ﻗﺼﺪ ﻭﻻ ﺧﺖ ﺑﺎﻟﻮ
ﻟﻠﻤﺸﻜﻠﺔ ﺍﻟﻤﻤﻜﻦ ﺗﻌﻤﻼ ﻫﺬﻩ ﺍﻟﻌﺒﺎﺭﺓ ﻓﻲ ﺍﻟﺨﻄﺎﺏ ..
ﺍﻟﻰ ﺍﻟﻠﻘﺎﺀ